Беларусь чемпионатида тўп тепаётган ўзбекистонлик футболчи Жасур Яхшибоев Осиё футбол конфедерацияси расмий сайтига катта интервью берди. «Дарё» интервьюни ўзбек тилида тақдим этади.
Маълумот учун, Яхшибоев жамоаси «Энергетик-БГУ» 4-турдан сўнг 9 очко билан мусобақа жадвалида 2-ўринда бормоқда. Жасур эса 3 та гол билан тўпурарлар пойгасида 1-ўринни банд этиб турибди.
«Беларусь чемпионатининг илк туриданоқ ажойиб старт олдик. Европада анча машҳур бўлган БАТЭга қарши баҳсда бизнинг ғалаба қозона олишимизни, тўғриси, ҳеч ким кутмаганди. Бироқ ушбу баҳснинг асосий қисмида биз катта иштиёқ билан ўйнадик. Дебют ўйинимда мен ҳам ўзимни фақат яхши томондан кўрсатишга ҳаракат қилдим. Майдонда берилган вазифани бажариш ва гол уриш жуда муҳим эди. Ҳужумчи ҳар доим майдонга тушдими, рақиб дарвозасини ишғол қилишга ҳаракат қилиши лозим. Мен ҳам ҳар доим шунга ҳаракат қиламан».
— Мавсум бошланишига қадар Беларусда нималарга эришишни кўзлаган эдингиз?
«Беларусь чемпионатига келишимнинг асосий сабаби — бу ерда ўзимнинг энг яхши ўйинимни кўрсатиб, сўнгра Европанинг кучли клубларидан бирига ўтишни хоҳлашим билан боғлиқ. Мақсадим — голлар уриш ва жамоадошларимнинг гол уришига ёрдамлашиш. Беларусь чемпионатининг энг яхши тўпурари бўлишни истайман».
— Борисовда БАТЭни 3:1 ҳисобида мағлуб этдингиз. Сиз эса 2 та гол урдингиз. Мухлислар иштирокингизни қандай кутиб олди?
«БАТЭдек гранд жамоага 2 та гол уриш — ажойиб натижа. Кўпчилик буни яхши қабул қилди. Дублга эриша олганимдан кўплаб мухлислар жуда хурсанд эди. Секин-аста Беларусда мени таниб боришмоқда».
— Ўзбекистон ва Беларусь футболи орасидаги фарқ қандай деб ўйлайсиз?
«Агар Беларусь ва Ўзбекистон чемпионатини ўзаро солиштирадиган бўлсак, ўйин услубида бироз фарқ бор. Иккала чемпионат ҳам ўзига яраша кучли. Ҳар бир чемпионатнинг ўзига яраша кучли томонлари бор. Бу ерда Европага хос ҳар ҳолда шунга яқинроқ ўйин кўрсатишади. Беларусь чемпионатининг даражасида ҳам анча яхши».
— Бу сизнинг легионер сифатида клубдаги биринчи тажрибангиз. Фарқлар қандай? Футбол майдони ва ундан ташқарида қандай ўзгаришлар қилиш керак бўлди?
«Ҳа, фаолиятимда илк бор легионерга айландим. Легионерлар ҳар доим маҳаллий ўйинчиларга қараганда кучли бўлиши шарт. Улар ҳар бир ўйинда маҳаллий ўйинчиларга қараганда кучлироқ ва чиройлироқ ўйин кўрсатиши лозим. Хорижда тўп тепишнинг кўплаб устунлик берадиган тарафлари ҳам бор. Инсон сифатида ўсиш мумкин. Шунингдек, ҳозир мен учун ҳам футболчи сифатида ўсишга эришиш учун қулай вақт ҳисобланади.»
— Коронавирус вақтида давом этаётган кам сонли лигалардан бири, албатта, Беларусь чемпионатидир. Футболчи сифатида ўзингизда кўпроқ диққат-эътиборни ҳис қиляпсизми? Ёки бу одатий ҳолга айланиб бўлганми?
«Кўплаб давлатлар ўзларида футбол баҳслари тўхтатилгани сабаб Беларусь чемпионатини транляция қилмоқда. Бутун дунёда Беларусь чемпионатини кузатишмоқда. Бу жуда яхши реклама. Футболчилар учун жуда яхши имконият. Шу боисдан ҳам ўзимни фақат яхши тарафдан кўрсатишга ҳаракат қиляпман».
— «Энергетик»нинг ўтган мавсумдаги энг яхши ҳужумчиси Илья Шкурин ЦСКА билан шартнома имзолади. Ҳозир эса Беларусь чемпионатига эътибор одатдагидан кучли. Агар шундай яхши иштирок этишда давом этсангиз, сизда бошқа хориж клубига ўтиш имконияти бўладими? Ёки ҳали ҳам «Пахтакор»га қайтишдан умидвормисиз?
«Ўтган мавсум Шкуринда бўлган имконият энди менда ҳам пайдо бўлиши мумкин. Негаки айни дамда барча Беларусь чемпионатини томоша қилмоқда. Агар мавсум сўнгига қадар яхши ўйнашда давом этсам, албатта, кучли чемпионатга ўтиб, гранд жамоа либосида ҳаракат қилиш имкониятига эга бўлишим мумкин. Мақсадим аниқ — Европада тўп тепиш. «Пахтакор»га қайтишни хоҳламайман».
— Йил бошида Ўзбекистон олимпия терма жамоаси сафида Таиланддаги U-23 Осиё чемпионатида ярим финалга қадар етиб бордингиз. Жамоа Олимпиада йўлланмасини қўлга кирита олмади, аммо сизнинг иштирокингиз яхши чиқди. Ортга назар ташласак: бу мусобақа сиз учун қандай ўтди? Муваффақиятми, омадсизликми ёки шунчаки ўртача?
«Таиланддаги Осиё чемпионатида ярим финалга чиқди. Аммо бизнинг мақсадимиз Токио Олимпиадасига йўлланмани қўлга киритишдан иборат эди. Аммо умуман олиб қаралса, ярим финал ҳам ёмон натижа эмас. Аммо биз ёзги Олимпиада ўйинларидан қуруқ қолдик. Шунинг учун бу натижани муваффақиятсизлик деб ҳисоблайман».
— Ушбу чемпионатдан олган энг муҳим жиҳатлар қайси бўлди?
«U-23 Осиё чемпионатида иштирок этиш орқали ўз тажрибамизни ошириб олдик. Мусобақа даражаси ҳам яхши эди. Бу мусобақа ёш футболчиларнинг ўзини кўрсатиш учун яхши имконият ҳам бўлди. Менда ушбу чемпионатдан фақат ижобий таассуротлар қолди».
— Ҳозир 22 ёшдасиз? Аммо халқаро футбол қачон қайтишини билмаймиз. Бироқ ҳозирги тайёргарлигингиз, терма жамоага тезроқ қайтиш имкониятини тақдим этадими?
«Миллий терма жамоа шарафини ҳимоя қилиш — ҳар бир футболчи учун шараф. Ўзбекистон терма жамоасидан чақирув олиш учун Беларусда энг яхши ўйинимни кўрсатишга ҳаракат қиламан. Келажакда терма жамоамиз учун муҳим ўйинчи бўлиш ниятидаман. Жамоа учун фойдали футболчи бўлишни хоҳлайман».
Бошқа интервью ва мақолалар:
- АПЛ энг зўр лига, «Энфилд» энг яхши стадион. «Ливерпуль»нинг япониялик илк футболчиси Такуми Минамино интервьюси
- Одил Аҳмедов коронавирус, кўршапалак ва Хитой таомлари, Кевин де Брюйне ҳамда Ўзбекистонга қайтиши борасида
- Элдор Шомуродов Ростовдаги карантин, ҳаётидаги энг муҳим шахс ва азалий орзулари ҳақида
- Дарс қолдиргани учун тарсаки еган, болалигида футбол ўйнаш тақиқланган, Ferrari, самолётлардан воз кечган Садио Мане ҳақида
- Танқидлар, хотиржамлик, Зиданнинг ёрдами ва Каземиф ҳақида. «Реал»нинг 19 ёшли янги юлдузи Винисиуснинг катта интервьюси
- Чандиқли киши. 2 ёшида оғир ЙТҲга учраган, кейинчалик исломни қабул қилган Франк Рибери ҳақида
- 3 мингта жароҳатни бошдан кечирган, MMA’ни ёқтирмайдиган ва катталар учун фильмларда рол ижро этишга мажбур бўлган Жеки Чан ҳақида
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)