Немисча аниқлик, португалча дид. ЖЧ—2018 мусобақасида киритилган энг чиройли 10 та гол (видео)

Коронавирус пандемияси сабаб дунё бўйлаб деярли барча спорт мусобақалари тўхтатилди. Шу жумладан, футбол бўйича мусобақалар ҳам. «Дарё» мухлисларнинг талаб ва таклифларини инобатга олган ҳолда турли мусобақаларда урилган энг сара голларни тақдим этиб боради. Ушбу лойиҳанинг навбатдаги сонида Россия майдонларида ўтган 2018 йилги Жаҳон Чемпионатида киритилган энг чиройли голлар тақдим этилади. Голлар рейтинги ФИФА талқинига кўра тузиб чиқилган.

10-ўрин. Тони Кроос, гуруҳ босқичи|Германия—Швеция (2:1)

Мусобақа сенсациясига айланган Германия терма жамоасига гуруҳ босқичида умид бағишлаган гол. Иккинчи турда доирасида Швецияга қарши кечган баҳсда Тони Кроос учрашувнинг 95-дақиқасида жарима зарбасини голга айлантиради ва илк турда Мексикага ютқазиб қўйган (0:1) немисларда умид учқуни пайдо бўлади. Кейин нималар бўлгани барчангизга маълум. Айтганча, голни нишонлаш пайтидаги кадрдан Ўзбекистон байроғи ҳам ўрин олган.

9-ўрин. Рикарду Куарежма, гуруҳ босқичи|Эрон—Португалия (1:1)

Плей-офф босқичи йўлланмасини ҳал қилиб берган ўйин жуда асабий руҳда ўтганди. Рикарду Куарежма эса ўз услубида, буцисининг ташқи томони билан зарба бериб биринчи бўлим сўнггида ҳисобни очган ва бу гол португалларга кейинги босқич эшикларини очганди. Дарвоқе, Али Ризо Бейронванд ушбу мусобақада иккита тўп ўтказиб юборади, Куарежмадан ташқари бу бахт Диего Костага ҳам насиб этганди.

8-ўрин. Аҳмад Муса, гуруҳ босқичи|Нигерия—Исландия (2:0)

Аҳмад Муса Исландия терма жамоаси ҳимоясини бир ўзи доғда қолдирган ҳолда учрашувдаги дублини нишонламоқда. Унинг мазкур учрашувдаги биринчи голи ҳам ёмон чиқмаганди.

7-ўрин. Носир Шадли, 1/8 финал|Бельгия—Япония (3:2)

Носир Шадли ҳали ҳам япониялик футболчи ва мухлисларнинг тушига кириб чиқса ажаб эмас. Учрашувнинг дастлабки бир соати ортда қолган: Япония терма жамоаси 2:0 ҳисобида олдинда бормоқда... 65-дақиқада Маруан Феллаини ва Носир Шадли майдонга туширилади, бу эса ўйинда кескин бурилиш ясайди. 94-дақиқада Носир Тибо Куртуа бошлаб берган қарши ҳужумни гол билан якунлайди ва «қизил иблислар»ни чорак финалга олиб чиқади. Бу голнинг ўзи чиройли бўлмаслиги мумкин, аммо голгача бўлган ажойиб комбинация ва унинг қадри сабаб кучли ўнликдан жой олган бўлса не ажаб.

6-ўрин. Денис Черишев, 1/4 финал|Россия—Хорватия (2:2, пенальтилар — 3:4)

Бўлажак финалчи Хорватия учун жуда қийин кечган учрашувлардан бири. Денис Черишев 31-дақиқада ўзининг ажойиб зарбаси билан русларни олдинга олиб чиқади. Охир оқибат Россия терма жамоаси пенальтилар сериясига кўра имкониятни бой бериб қўяди ва мусобақа билан аламли тарзда хайрлашади.

5-ўрин. Лионель Месси, гуруҳ босқичи|Нигерия—Аргентина (1:2)

3-турга келиб бир дуранг ва бир мағлубият қайд этган Аргентина нимчорак финалга йўл олиши учун мазкур учрашувни ғалаба билан тугатиши шарт эди. Мессининг 14-дақиқада киритган тўпи тенг курашлар остида ўтган бу ўйинда Аргентинанинг ғалабасида муҳим ролни ўйнайди.

4-ўрин. Криштиану Роналду, гуруҳ босқичи|Португалия—Испания (3:3)

Криштиану испанларнинг тўлиқ устунлигида кечган баҳснинг 88-дақиқасида жарима зарбасини қойилмақом ижро этиб, ҳет-тригини нишонлайди ва жамоасига муҳим очкони олиб келади. Ўйиндан кейин бир қатор нашрлар бош муқоваси «Роналду—Испания 3:3» сарлавҳаси остида чиқди. Криштианунинг индивидуал маҳорати ва Давид Де Хеанинг қўпол хатоси ўйин натижасига таъсир қила олганди.

3-ўрин. Лука Модрич, гуруҳ босқичи|Аргентина—Хорватия (0:3)

Кескин кураш ва асабий руҳда кечган баҳсда Лука Модрич 80-дақиқада мана шу чиройли голи билан учрашув тақдирини деярли ҳал қилиб қўйганди. Танаффусга қадар нурсиз ўйин қайд этилган, иккинчи бўлимда хорватлар амалдаги финалчиларга ҳеч қандай имконият қолдирмаган эди. Мазкур баҳсни Равшан Эрматов бошчилигидаги ўзбекистонлик ҳакамлар гуруҳи бошқарганди.

2-ўрин. Хуан Кинтеро, гуруҳ босқичи|Колумбия—Япония (1:2)

Колумбия учун жуда омадсиз ўтган ўйинда Хуан Кинтеро жарима зарбасидан айёрона усулда фойдаланиб вазиятни ўнглашга ҳаракат қилади, бироқ сондаги устунлик шарқий осиёликларга қўл келади ва якунда Япония ўзига керакли бўлган ғалабага эришади. Учрашувнинг 3-дақиқада колумбияликлар Карлес Санчеснинг қўпол хатосидан кейин бир киши кам бўлиб қолгани етмагандек, пенальтидан тўп ҳам ўтказиб юборади.

1-ўрин. Бенжамин Павар, 1/4 финал|Франция—Аргентина (4:3)

Мусобақани безаган «пушка» гол! Бенжамен Паварнинг бу голи чиройли чиқиши билан бирга, ўйинда кескин бурилиш ясагани билан ҳам ажралиб туради. Дастлаб ҳисобда олдинга ўтиб олган бўлажак Жаҳон Чемпионлари биринчи бўлим сўнгги ва иккинчи бўлим аввалида ўз дарвозасидан тўп олиб чиқади. Паварнинг мазкур голи эса французларни хавотирдан қутқаради ва кейинроқ Килиан Мбаппе тўрт дақиқа ичида иккита тўп киритган ҳолда ўйин масаласини ҳал қилиб қўяди.