Марказий банк 15 апрель куни нейтраллилик принципини бузмагани, биржада талабни қондириш учун валюта сотмагани ҳисобига валюта биржасида доллар курси 10 121 сўмгача кўтарилган. Бу ҳақда Марказий банк раиси Мамаризо Нурмуротов 15 апрель куни бўлиб ўтган брифингда маълум қилди.
Нурмуротовнинг таъкидлашича, бозор девалвацион кутилмалар ҳисобга олиниб, талаб ва таклифлар асосида шакллантирилса, ўзи маълум мувозанатга келади. Марказий банк раисига бунга мисол тариқасида Республика валюта биржасида 15 апрель куни кузатилагн ҳолатни кўрсатди.
«15 апрель куни валюта биржасида талаб даражаси 62 миллион АҚШ долларини ва 16 миллион евродан ортиқни ташкил этган бўлса, алмашув курсининг 10 121 сўмгача ошиши валюта сотиб олиш бўйича аризаларнинг катта қисми, қарийб 80 фоизини қайтариб олинишига сабаб бўлди. Аввалги кунларда бундай ҳолат кузатилмаган эди», — деди Нурмуротов.
Унинг қайд этишича, аввалги кунларда бундай ҳолат қайд этилмаганига йирик миқдордаги валютага бўлган талабни Марказий банк маълум жиҳатдан нейтраллилик принципини бузиб, қўшимча валюта сотиш ҳисобига қондириб келгани сабаб бўлган.
«Марказий банк бошқарувининг куни кеча бўлиб ўтган йиғилишида нейтраллилик принципини доимо сақлаб қолишни, нейтраллилик принципида фаолиятимизни давом эттириш бўйича қарорга келдик ва бу қарор валюта бозоридаги бугунги ўзгаришларда ўз аксини кўрсатди», — дея қўшимча қилди Марказий банк раиси.
Маълумот учун, 15 апрель куни Республика валюта биржасидаги савдолар чоғида доллар курси 328 сўмга ўсиб, 10 121 сўмни ташкил этди. Шундан сўнг Марказий банк сўмнинг хорижий валюталарга нисбатан 16 апрелдан амал қиладиган янги курсларини белгилади, унга кўра доллар курси 427 сўмга ўсиб, 10 121 сўмни ташкил этди.
Аввалроқ, 14 апрель куни Ўзбекистоннинг бир қатор банклари долларни 10 минг сўмдан юқори қийматда сотиш ва сотиб олишни бошлаган эди. Шу куни Марказий банк бошқаруви асосий ставкани 1 фоиз бандга пасайтириб, йиллик 15 фоиз даражасида белгилаш ҳақида қарор қабул қилган эди.
Мавзуга доир:
Изоҳ (0)