Унга кўра, АҚШ доллари курси 427 сўмга ошиб, 10 121 сўмни, евро эса 512 сўмга ошиб, 11 111 сўмни, Россия рубли эса 7 сўмга ошиб, 139 сўмни ташкил этди (маълумот учун, Республика валюта биржасида 15 апрель куни бўлиб ўтган савдолар чоғида доллар курси 10 121 сўмга, евро курси эса 11 111 сўмга етган).
Қайд этиш жоиз, валюталарнинг расмий курси бир ҳафта ичида иккинчи марта янгиланди. Одатда Марказий банк томонидан ўрнатиладиган расмий курс ҳафтасига бир марта, сешанба кунлари янгиланар эди.
Эслатиб ўтамиз, 14 апрель оқшомида Ўзбекистон тижорат банклари доллар курсини сезиларли ошириб, АҚШ валютасини 10 минг сўмдан юқори қийматда сотиш ва сотиб олишни бошлаган эди. Худди шу куни Марказий банк асосий ставка (қайта молиялаш ставкаси)ни 16 фоиздан 15 фоизга тушириш ҳақида қарор қабул қилган эди.
Бунгача Марказий банк 13 апрель куни баёнот бериб, апрель ойи бошидан сўмнинг кескин қадрсизланишига экспорт тушумлари ва пул ўтказмалари ҳажми қисқаргани, шунингдек, Россия рубли ва Қозоғистон тенгеси қадрсизланганини асосий сабаб сифатида келтирган эди.
Шу билан бирга, Марказий банк сўм алмашув курсининг қадрсизланиши эҳтимолини паст даражада баҳолашини билдирган эди.
Изоҳ (0)