Чеченистон раҳбари Рамзан Қодиров «ўзини яккалаш» тартибини бузган фуқаролар учун янги жазо чорасини ўйлаб топди — у карантинга риоя қилмаганларни қишлоқ хўжалиги ишларига жалб қилишни таклиф этди. Бу ҳақда «Чечня Сегодня» портали хабар берган.
Чеченистон республикаси етакчисининг фикрича, бир кишининг хатоси учун бутун оила жавобгар бўлиши нотўғри, шу сабабли фуқаро жамият олдида қилган айби учун бошқачароқ услубда жазоланади.
«Уйида тинчгина ўтира олмай кўчага чиқдими? Демак, ҳар куни далада ишлаб элга фойда келтиради. Биз унга (қоидабузарга) иш топиб берамиз. Ер чопади, экин экади ва уни парваришлайди», — деди Қодиров.
Рамзан Қодировнинг айтишича қоидабузарлар Россияда эпидемия якунига етгунига қадар уйига қайтмайди.
Чеченистон раҳбари карантин тартибини бузган фуқароларни бир неча бор танқид қилган. 6 апрель куни «ўзини яккалаш» тартибини бузган фуқарони калтаклаган ходимларни мақтаб, уларни мукофотлашни ваъда берган.
«Менимча ҳам минглаб одамларни тупроққа қўйгандан, битта одамни дўппослаган яхши. Шу сабабли ҳам қаттиқ чоралар кўрилмоқда. Керак бўлса тўқмоқ билан урамиз. Вазият тақозо этса қамоққа, ертўлага тиқамиз, лекин халқни ҳимоя қиламиз», — деган Рамзан Қодиров.
Чеченистон коронавирус тарқалишининг олдини олиш мақсадида Россия федерациясига кириш ва чиқишни тўлиқ чеклаб қўйган биринчи федерал ҳудуд. Қодиров кириш-чиқиш ёпилишидан аввал барча фуқароларни 5 апрелгача ҳудудга қайтишга чақирган. Чекловлар ишлаб чиқариш транспорти ва тиббиёт буюмларини ташишга таалуқли эмас. Бундан ташқари, республикада тунда кўчага чиқиш тақиқланган. Қодировнинг айтишича бу ҳали «коммендатлик соати» эмас, балки «ҳаракатни-тўхтатиш» чораси.
Мавзуга доир: Рамзан Қодиров ингушларни сўккани учун узр сўради
Изоҳ (0)