13 апрель ҳолатига кўра Қирғизистонда яна 42 кишида коронавирус аниқланди, деб хабар беради «Kloop.кг».
Шундай қилиб, бутун мамлакатда янги турдаги коронавирус билан касалланган беморлар сони 419 кишига етди. COVID-19 билан янги касалланиш ҳолатлари мамлакатнинг қуйидаги ҳудудларида қайд этилди:
- Бишкек — 10;
- Чуй вилояти — 6;
- Ўш вилояти — 9;
- Ўш шаҳри — 5;
- Жалолобод вилояти — 2;
- Норин вилояти — 9;
- Баткен вилояти — 1.
Шунингдек, янги касаллар орасида тиббиёт ходимлари ҳам бор. Қирғизистон Соғлиқни сақлаш вазирлигининг маълум қилишича, 13 апрель ҳолатига кўра яна 16 нафар тиббиёт ходимида коронавирус аниқланган бўлиб, мамлакатда коронавирус билан касалланган тиббиёт ходимлари сони 79 нафарга етди.
Таъкидланишича, 11 нафар бемор оғир аҳволда, уларнинг 6 нафари жонлантириш бўлимида. Оғир аҳволдаги беморларнинг уч нафари — тиббиёт ходими.
Ўзбекистонда 13 апрель соат 10:00 ҳолатига кўра коронавирус инфекциясини юқтириб олган фуқаролар сони 896 кишига етди. Ўзбекистонда коронавирус инфекциясига чалиниш билан боғлиқ дастлабки ҳолат қайд этилганидан бери 66 киши соғайди, тўрт киши (икки аёл ва икки эркак) эса вафот этди. Аввалроқ Андижон вилояти ҳокими Шуҳрат Абдураҳмонов вилоятда вирусга чалинган беморларнинг 78 нафари тиббиёт ходими эканлигини маълум қилди.
Изоҳ (0)