Россияда арзон бензиннинг импорти бекор қилиниши мумкин. Мамлакат энергетика вазири ушбу таклиф юзасидан изоҳ берди

Россия энергетика вазирлиги мамлакатда нефть маҳсулотларининг импортига олти ой муддатга тақиқ қўйишни таклиф этди, бунда ички бозорга хорижнинг арзон бензини киритилмайди ва ушбу қарордан кўзланган мақсад ички нефтни қайта ишлаш заводларини қўллаб-қувватлашдан иборат. Бу ҳақда энергетика вазири Александр Новак «Россия-1» телеканалидаги кўрсатувда маълум қилди, деб ёзмоқда «РБК».

Новакнинг айтишича ушбу мажбурий ва бозор иқтисодиёти шароитларига тўғри келмайдиган чорани кўп мамлакатлар, жумладан, Қозоғистон ҳам қўлламоқда. У ерда ҳам нефть маҳсулотларини республика ҳудудига олиб кириш чеклаб қўйилган.

«Биз ушбу чеклов орқали нефтни қайта ишлаш соҳамизни сақлаб қолмоқчимиз, бу аввало ишчи ўринларини сақлаб қолиш демакдир, иш ўринларининг қутқариб қолиниши нефтни ишлаб чиқарадиган заводлар фаолиятининг узлуксизлигини таъминлайди», — дея қайд этган Новак.

Энергетика вазирлигининг импортни чеклаш бўйича таклифини соҳа бўйича комплекс раҳбари бош вазир ўринбосари Юрий Борисов ҳам қўллаб-қувватлаган.

Хабарларга кўра, тақиқ яқин кунларда кучга киради ва бу апрель ойида содир бўлиши кутилмоқда. Аввалига компанияларга бу ҳақда хабар қилинади, сўнгра ҳукумат қарори билан чеклов меъёрлари белгилаб қўйилади, деб ёзган «РБК». Тақиқ вақтинчалик бўлади ва сентябргача амал қилади — ушбу давр давомида Энергетика вазирлиги прогнози бўйича арзон нархлар сақланиб туради.

Жаҳон бозорида нефть нархи коронавирус пандемияси ҳамда нефть ишлаб чиқарувчи давлатларнинг ОПЕК+ келишуви муддатининг тугаши оқибатида кескин тушиб кетганди. Келишув 1 апрелдан ўз кучини йўқотган, сабаби картель аъзолари уни узайтириш ёки «қора олтин» ишлаб чиқариш ҳажмини камайтириш борасида бир қарорга кела олмаганди. 9 апрелда бўлиб ўтган музокараларда Мексикадан ташқари барча иштирокчилар янги келишув имзолашга рози бўлди.Бензин нархи хорижда нефть қийматининг тушиши оқибатида пастлади, Россияда эса депмфер, яъни ички бозордаги ўзига хос механизм туфайли ўзгаришсиз қолди. Унга кўра, ёқилғи турли сакрашлардан ҳимоя қилинади ва нефть котировкаларининг тебранишларидан сақлайди. Ушбу механизм туфайли нефть ишлаб чиқарувчилар ички бозордан ортиқча мукофот пуллари олса давлатга қўшимча пул тўлайди, шу сабабли ёқилғи қуйиш шохобчаларидаги нархлар ўзгармайди. Борди-ю ички бозорда дисконт ҳолати кузатилса, аксинча давлат компаниялар нархни кўтармаслиги учун уларга пул тўлайди.

Яъни дунё бозорида нефть нархи тушса ва импорт қилувчи компаниялар уни арзон харид қилиб қиммат сотса, ортиқча даромадни давлатга қайтаради ва аксинча жаҳонда нефть кўтарилиб, бензин нархи ички бозорда ўзгармаса давлат уларга кўрилган зарарни қоплаб беради.