Буюк Британияда E30 кузовидаги BMW 325iX — «вақт капсуласи» сотувга қўйилди. Машина 34 йил давомида 509 километр масофа босиб ўтган бўлиб, махсус боксда мўътадил ҳарорат остида сақланган. Седан 1986 йили даниялик коллекционер томонидан харид қилинган: автомобиль тўлиқ янги ҳолатда ва бирор марта рўйхатга олинмаган, деб хабар беради Super Vettura.
BMW 325iX — Бавария маркаси томонидан урушдан кейин ишлаб чиқарилган тўлиқ узатмали илк автомобиль. Седанни ишлаб чиқариш 1985 йилда бошланган бўлса, 1985 йилнинг мартига келиб сотувга чиқарилган. Машинага 170 кучга эга 2,5 литрли M20B25 инжектор двигатели ўрнатилган.
BMW 325iX’нинг эгаси машинадан деярли фойдаланмаган: седаннинг айрим эшиклари 30 йилдан ортиқ вақт давомида очилмаган ҳам. BMW E30’нинг мойи алмаштирилган, янги аккумулятор ўрнатилган ва диагностикадан ўтказилиб, сотувга қўйилган. Ҳатто Michelin шиналари ҳам заводдан чиққанидан бери шундайлигича турибди.
Янги BMW 3325iX E30 қиммат: салон автомобиль учун 48 минг фунт стерлинг сўрамоқда — бу пулга Буюк Британияда янги BMW 5-Series харид қилса бўлади. Экспорт бозори учун нарх бироз пастроқ: Канада ёки АҚШдаги харидорлар E30’ни 40 минг фунт стерлингга олиб кетиши мумкин.
Изоҳ (0)