Қашқадарё вилояти Чироқчи туманида дўконда ўғрилик содир этган шахс ушланди. Бу ҳақда Миллий гвардия матбуот хизмати хабар берди.
Маълум бўлишича, Чироқчи тумани марказида 8 апрелдан 9 апрелга ўтар кечаси об-ҳаво сабабли техник носозлик юзага келиб, туман вақтинча электр таъминотидан узилган. Вазиятдан келиб чиқиб ҳудудда Миллий гвардия Қўриқлаш бошқармаси ходимлари қўриқловдаги объектларнинг назоратини янада кучайтирган.
Тонги соат 04:00 ларда туманнинг Мустақиллик кўчасида жойлашган канцтовар дўкони кириш эшигининг қулфи бузиш йўли билан очилганлиги аниқлаган. Ноқонуний равишда дўконга кириб ўғирлик қилган шахс дўкондан чиқиб кетмоқчи бўлиб турган вақтда, у Миллий гвардия ходимлари томонидан воқеа жойида ашёвий далиллар (2 миллион 100 минг сўм ва Samsung А 10 русумли уяли телефон аппарати) билан қўлга олинган.
Хабарда айтилишича, айни вақтда ушланган шахс Чироқчи туман ички ишлар бўлимига ўрнатилган тартибда топширилган ва ҳолат юзасидан суриштирув ишлари олиб борилмоқда.
Изоҳ (0)