Сирдарёда 7 апрель, сешанба куни, карантин қоидаларига риоя қилмай, жамиятда юриш-туриш қоидаларини бузиб, велосипедда бақир-чақир қилган фуқаро 15 суткага қамалди.
ИИВ матбуот хизматининг хабар беришича, ушбу фуқаро вилоятнинг Боёвут туманидаги Элобод кўчасида яшовчи 39 ёшли У.Ю. бўлиб, у Маъмурий жавобгарлик тўғрисидаги кодекснинг 54-моддаси (Эпидемияга қарши кураш қоидаларини бузиш), 183-моддаси (Майда безорилик) ва 194-моддаси (Ички ишлар органлари ходимининг қонуний талабларини бажармаслик) билан айбли деб топилган.
Қоидабузарга Маъмурий ишлар бўйича Гулистон тумани суди томонидан 15 сутка маъмурий қамоқ жазоси тайинланган.
Аввалроқ Фарғонада ҳам жамиятда юриш-туриш қоидаларини қасддан менсимасдан, сабабсиз бақир-чақир қилиб, профилактика инспекторини ҳақорат қилган велосипедда юрган маст фуқаро 15 суткага қамалган эди. Карантин қоидасини бузиб, ички ишлар ходимларига қаршилик кўрсатган аёл ҳам 5 суткага қамалган.
Эслатиб ўтамиз, Ўзбекистонда 6 апрелдан мототранспорт ва велосипедда ҳаракатланиш карантин даврида вақтинча чекланди. Фақатгина ҳаётий зарур эҳтиёжлар — озиқ-овқат, дори-дармон, тиббий буюм ва воситалар харид қилиш, шифокор кўригига мурожаат этиш, шунингдек, иш жойига бориш ва келиш учун рухсат этилади.
Изоҳ (0)