Самарқандда ёғган кучли ёмғир оқибатида шаҳар яна сувга тўлди. Бунинг оқибатида баъзи эски уйлар қулаб тушган. Таъкидланишича, бундай ҳолат Самарқандда биринчи бор кузатилмаяпти. Шаҳарда ирригация тармоқларида жиддий муаммолар бор. Бу ҳақда «Севимли» телеканалининг «Замон» ахборот дастури томонидан маълум қилинди.
Таъкидланишича, салкам 24 соатдан буён (ёмғир 6 апрель куни ёғган) айрим уйларда сувни бартараф этиш ишлари тугамаган. Ёмғирдан талафот кўрган уйларнинг ертўла қисмида ошхона анжомлари сузиб юрганини кўриш мумкин.
«Ёмғир ёғиши натижасида кўчамиздан ўтган ариқдаги сувлар йиғилиб, ҳеч ерга кетмади. Соат 17:00 лардан бошланган бўлса, ярим соат ўтиб ертўлага сув киришни бошлади. Ариқни тозалаш мақсадида ичидаги лойларни олишган эди, лекин уни опкетишмасдан ариқни ёпиб қўйишган», — дейди фуқаролардан бири.
Фавқулодда вазиятлар бошқармаси қутқарувчилари ёмғирдан зарар кўрган хонадонларда ҳали ҳам қутқарув ишларини давом эттирмоқда. Қутқарувчиларнинг сўзларига кўра, кеча вазият бундан ҳам ёмон бўлган.
«Ҳақиқатан ҳам ўша жойни жуда катта сув босган экан. Хонадон эгаси оғир аҳволда бўлган, қон босими кўтарилиб кетгани учун ҳеч қаерга қимирлай олмаган. Қутқарувчиларимиз ойнани синдириб хонадонга кириб борди ва фуқарога ёрдам кўрсатилди», — дейди ФВБ Минтақавий қутқарув гуруҳи командири Рустам Эркинов.
Самарқанд шаҳридаги Ашхар ота кўчасидаги иккита уйга жиддий зарар етган, улардан бирининг эгаси кечанинг ўзида уйини ташлаб чиқиб кетишга мажбур бўлган.
ФВБ мутахассислари хонадонларга сув кириб кетишининг сабабини ариқлар чиқиндиларга тўлиб қолгани билан изоҳламоқда. Буни уй эгалари ҳам тасдиқлаган. Лавҳадан кўриш мумкинки, бир хонадон рўпарасидан ариқ чиқиндиларга тўлиб қолгани оқибатида тўртта уйга сув тошиб кирган. Шунингдек, Самарқанд шаҳрининг марказий кўчаларида ҳам ёмғир оқибатларини кўриш мумкин.
«Самарқанд шаҳри ва Самарқанд туманида 14 та жанговар экипаж хизмат олиб борди. Шаҳар катта бўлгани учун имкон борича ўзимизнинг вазифамизни бажаришга ҳаракат қилдик. Ҳозирда уйлар зарар кўрмаган. Асосан, кўчаларда тўпланиб қолган сувларни жанговар машиналар ёрдамида чиқариб ташлаш йўлларини қилдик», — дейди ФВБ бошлиғининг биринчи ўринбосари Илҳом Исмоилов.
Бироқ лавҳада келтирилган тасвирлар раҳбарнинг маълумотларга зид келади.
Мавзуга доир: Самарқандда сув тошқини уй деворини вайрон қилди (видео)
Хусусан, «Истиқлол» маҳалласи Чашмаи Хизр кўчасидаги 48 ва 50-уйларда энди яшашнинг иложи йўқ. Сув келтирган зарар оқибатида иккита хонадон ҳам қулаб тушган. Уй эгаларининг таъкидлашича, ёмғир оқибатида юзага келган тошқин сабаб уйдан чиқишнинг иложи бўлмаган, қўшнилар ёрдамга келиб, уларни деразадан олиб чиқишга муваффақ бўлган.
«Икки ўғли ва икки келини, олти набираси билан бир кеча ётишга жой топишга муваффақ бўлганлар, бугун қаерда ётиш ташвишини қиляпти. Карантин вақтида бировнинг уйига бориб, ётоқ сўрашнинг ўзи қанчалик қийинлигини тасаввур қиляпсизми?!», — дея вазиятни изоҳлайди мухбир.
Жабрланган аёлнинг сўзларига кўра, улар ҳатто ҳужжатларни олиб чиқишга ҳам улгурмаган: «Қарасак, деворлар ‘қасар-қасар’ бўлиб йиқиляпти, ҳужжатларни олишга ўзимиз ҳам қўрқдик, қочиб чиқишга мажбур бўлдик. Сув бел бўйига кўтарилиб кетгани учун чиқиб қочдик».
Маълум қилинишича, ёмғир ушбу кўчадаги кўплаб хонадонларга моддий зарар келтирган. Лавҳага кўра, ёмғир кеча ёққан бўлса ҳам, ҳалигача ҳокимиятдан ҳеч ким келиб, хабар олмаган.
Мавзуга доир: Видео: Ёмғирдан сўнг сув остида қолган Самарқанд
У ҳолда нега одамлар бу ердан кўчмади, дея берилган саволга ФВБ ходими бунга Самарқанд ҳокимлигидан жавоб олиш кераклиги билан тушунтирган.
«Журналистлар воқеа жойига 24 соат ўтганидан кейин борган бўлса-да, ҳалигача ҳокимият вакиллари келмаганига қараганда, улар шаҳар ҳудудида мана шундай жой борлигини билишмайди, назаримизда ижтимоий тармоққа жойланган видеолар шаҳарнинг Садриддин Айний кўчасидаги хонадонга ҳам ёмғирдан кейинги сув тўпланиши жиддий зарар етказгани тасвирланган — уйнинг девори қулаб тушган», — дейилади лавҳада.
Изоҳ (0)