Ўзбекистон Президенти Шавкат Мирзиёев 8 апрель, чоршанба куни, коронавирус пандемиясига қарши курашишда жойлардаги ишлар натижадорлиги юзасидан ўтказилган видеоселектор йиғилишида коронавирусдан вафот этган 40 ёшли беморнинг оила аъзоларига ҳамдардлик билдирди.
«Мана шундай оғир синов дамларида кўпмиллатли халқимиз саросима ва ваҳимага тушмасдан, аксинча, четдан келган бу балонинг тезроқ ўтиб кетишига, ҳадемай яхши кунлар келишига ишониб, ўзининг мустаҳкам иродаси, меҳр-оқибати ва ҳамжиҳатлигини яна бир бор намоён этмоқда», — деди Шавкат Мирзиёев.
Мисли кўрилмаган даражада тарғибот ишларига қарамай уйида даволанган ва оғир ҳолатда ётқизилган 40 яшар бемор кеча оламдан ўтди, дейилади Президент матбуот хизмати хабарида.
Марҳумнинг оила аъзоларига ҳамдардлик билдирар экан, давлат раҳбари яна бир бор барчани огоҳликка чақирди. «Касаллик аломатини сездингизми, дарҳол шифокорларга мурожаат қилинг. Такрор айтаман, касалликнинг оиламизга кириб келмаслиги, ўзимиз ва яқинларимизни ушбу иллатдан сақлаб қолиш, энг аввало, ўзимизга боғлиқ!», — деди Президент.
Маълум қилинишича, ўтган даврда карантин қоидаларининг 47 мингга яқин бузилиш ҳолати, шу жумладан, 34 минг марта ниқоб тақмаслик, 11 минг марта автотранспортда карантинга риоя қилмаслик ҳолати аниқланиб, жарималар қўлланган. Ҳаттоки, 24 та ҳолатда юзлаб одамларни тўплаб, зиёфат ва маросимлар ўтказилгани аниқланган.
«Бутун дунёнинг бошига тушган бу мураккаб синовдан биз, Худо хоҳласа, янада кучли бўлиб, бир-биримизга меҳримиз янада зиёда бўлиб, албатта, ёруғ юз билан ўтиб оламиз. Фақат тартиб-интизомга қатъий риоя қилиб, ўринсиз ваҳимага тушмасак, тушкунликка берилмасак, марра бизники бўлади.
Бу вақтинчалик қийинчилик ва муаммолар, албатта, ўтиб кетади. Пок ниятли, дин-у диёнатли, сабр-бардошли, олижаноб халқимиз билан ҳали кўп яхши кунларни кўрамиз, кўп тўй-томоша ва тантаналарни биргаликда нишонлаймиз, олдимизга қўйган мақсадларимизга, албатта, етамиз,» — деди Президент Шавкат Мирзиёев.
Эслатиб ўтамиз, Ўзбекистондаги коронавируснинг 3-қурбони, Чирчиқ шаҳрида яшовчи фуқаро Ш. 30 март куни оғир аҳволда вилоят юқумли касалликлар шифохонасига ётқизилган. 31 март куни эса Тошкент шаҳридаги Эпидемиология, микробиология ва юқумли касалликлар илмий текшириш институти клиникасига ўтказилган. 7 апрель оқшомида беморнинг аҳволи кескин ёмонлашган. Етакчи шифокорлар томонидан берилган тавсиялар тўлиқ бажарилганига қарамай, бемор Ш.да юрак ва ўпка етишмовчилиги сабаб юрак фаолияти тўхташи кузатилган.
Шавкат Мирзиёев 3 апрель куни бўлиб ўтган видеоселектор йиғилишида Чирчиқда аниқланган коронавирусга чалиниш ҳолати ҳақида гапирган эди.
«Кечқурун Чирчиқдан оғир аҳволдаги беморни олиб келишди. Биласизларми, беш-олти кун жуда юқори ҳарорат билан уйида ётган. Ҳолбуки, ойнаи жаҳонда 24 соат давомида одамларимизга огоҳ бўлайлик, маданиятли бўлайлик, ўзимизга, бола-чақамизга эътиборли бўлайлик деяпмиз. Йўқ. Беш-олти кун ётган, оиласи бор, фарзанди бор, набираси бор, уйида ётган. Доктор чақирса бўлмайдими?», — деганди ўшанда Президент.
Маълумот учун, Ўзбекистонда коронавирусга чалинган беморлар сони 545 нафарга етди. Шу вақтгача уларнинг 30 нафари соғайган, 3 нафари вафот этган. Хорижда эса камида 23 ўзбекистонликда коронавирус аниқланган, уларнинг уч нафари вафот этган.
Изоҳ (0)