Япониянинг Business Breakthrough University университетида коронавирус пандемияси туфайли ўз-ўзини яккалаган тўрт нафар талаба битирув кечасида иштирок эта олиши учун Newme роботларига планшет ўрнатилди, деб хабар берди LADbible.
Планшет ўрнатилган Newme роботларини талабаларнинг ўзи масофадан туриб бошқарган. Улар ректорнинг қўлидан дипломни қабул қилиб олган, уларнинг роботларига эса академик қалпоқчалар кийдирилган.
Қолган талабалар эса диплом топшириш маросимига Zoom дастури орқали боғланган.
Битирув кечасини бундай тарзда ўтказиш ғояси бизнес бошқаруви кафедраси декани Шуго Янакага тегишли.
«Коронавирус тарқалишининг олдини олишга қаратилган чора-тадбирларга риоя этган ҳолда биз ажойиб битирув кечасини ўтказдик. Умид қиламизки, бизнинг ташаббусимиз битирув кечасини ўтказишда қийинчиликка дуч келган бошқа ўқув муассасаларига ёрдам беради», — дейди Шуго Янака.
https://twitter.com/kninsama/statuses/1245582278685687813
Аввалроқ Япония бош вазири Синдзо Абэ мамлакатда 7 апрель кунидан бошлаб фавқулодда ҳолат эълон қилиш режалаштирилаётганини маълум қилганди.
Изоҳ (0)