Yaponiyaning Business Breakthrough University universitetida koronavirus pandemiyasi tufayli o‘z-o‘zini yakkalagan to‘rt nafar talaba bitiruv kechasida ishtirok eta olishi uchun Newme robotlariga planshet o‘rnatildi, deb xabar berdi LADbible.
Planshet o‘rnatilgan Newme robotlarini talabalarning o‘zi masofadan turib boshqargan. Ular rektorning qo‘lidan diplomni qabul qilib olgan, ularning robotlariga esa akademik qalpoqchalar kiydirilgan.
Qolgan talabalar esa diplom topshirish marosimiga Zoom dasturi orqali bog‘langan.
Bitiruv kechasini bunday tarzda o‘tkazish g‘oyasi biznes boshqaruvi kafedrasi dekani Shugo Yanakaga tegishli.
“Koronavirus tarqalishining oldini olishga qaratilgan chora-tadbirlarga rioya etgan holda biz ajoyib bitiruv kechasini o‘tkazdik. Umid qilamizki, bizning tashabbusimiz bitiruv kechasini o‘tkazishda qiyinchilikka duch kelgan boshqa o‘quv muassasalariga yordam beradi”, — deydi Shugo Yanaka.
https://twitter.com/kninsama/statuses/1245582278685687813
Avvalroq Yaponiya bosh vaziri Sindzo Abe mamlakatda 7-aprel kunidan boshlab favqulodda holat e’lon qilish rejalashtirilayotganini ma’lum qilgandi.
Izoh (0)