Буюк Британия бош вазири Борис Жонсон коронавирус сабаб касалхонага ётқизилди. The Financial Times’нинг Британия ҳукуматига таяниб маълум қилишича, бош вазир эҳтиёт чораси сифатида шифохонага ётқизилган.
Борис Жонсонда вирус 27 март куни аниқланган эди. Орадан 10 кун ўтаётган бўлса-да, унда ҳамон касаллик белгилари сақланиб қолмоқда.
Британия бош вазири бу вақтга қадар уйда изоляция ҳолатида ҳукуматни видеоконференсалоқа орқали бошқаришда давом этаётганди.
Эслатиб ўтамиз, 25 март куни Британия тахти вориси — 71 ёшли шаҳзода Чарльзда ҳам коронавирус аниқланган. 31 март куни Чарльз коронавирусдан тузалиб, карантиндан чиққан эди.
26 март ҳолатига кўра, Буюк Британияда 48 440 кишида коронавирус аниқланган, беморларнинг 4943 нафари вафот этган.
Аввалроқ Қиролича Елизавета II Буюк Британия ва Ҳамдўстлик давлатлари аҳолисига телевидение орқали мурожаат йўллагани ҳақида хабар берилганди. Таъкидланишича, бу унинг 68 йиллик бошқаруви давридаги режадан ташқари тўртинчи телемурожаати ҳисобланади.
Изоҳ (0)