Россия президенти Валдимир Путин яна камида бир ҳафта давомида масофадан туриб ишлашни давом эттириши мумкин. Бу ҳақда президентнинг матбуот котиби Дмитрий Песков маълум қилган, деб ёзмоқда «РБК».
«Бир ҳафта ўтди. Тахминимча бу яна бир ҳафта ёки ундан бироз кўпроқ муддат давом этади», — дея президентнинг масофадан туриб ишлаётгани ҳақида берилган саволга жавоб қайтарган Песков.
Песков Коммунаркадаги коронавирус билан касалланган бош шифокор Денис Проценко билан учрашувдан кейин масофадан ишлашга ўтгани ҳақидаги хабарни инкор қилди. Матбуот котибининг сўзларига кўра, Путин шифокор билан март ойида учрашган.
Дмитрий Песковнинг қайд этишича, Коммунаркадаги бош шифокорнинг коронавирус юқтириб олгани инфекциянинг асосий тарқалиш манбайси одамлар билан бевосита мулоқот эканига яна бир исбот бўлиб турибди. Шу сабабли ҳам Путин масофадан ишлашга ўтган.Апрель бошида Россия президенти ҳукумат мажлисини видеоконференцалоқа тарзида ўтказган. Путин коронавирус билан боғлиқ вазият бундай чораларни кўришга мажбур қилаётганлигини таъкидлаган.
Изоҳ (0)