АҚШда 51 йил бирга яшаган эр-хотин коронавирус инфекцияси сабаб юзага келган касаллик оқибатида бир кунда вафот этди. Бу ҳақда марҳумларнинг ўғли Бадди Бейкер ўзининг Twitter’даги саҳифаси орқали маълум қилди.
Баддининг айтишича, 74 ёшли отаси Стюарт Бейкер ва 72 ёшли онаси Эдриан Бейкер 29 март куни олти дақиқа фарқ билан оламдан ўтган.
«Ота-онам менинг ҳаётимга катта таъсир кўрсатган ажойиб инсонлар эди, афсусуки, бир неча дақиқа фарқ билан биз иккисидан ҳам айрилиб қолдик», — дейди кичик Бейкер.
Унинг қўшимча қилишича, чол-кампирнинг соғлиғи жойида бўлган, бироқ ўтган ой шифокор уларга енгил пневмония ташхисини қўйган. Кейинроқ эр-хотиннинг аҳволи ёмонлашиб, иккиси ҳам шифохонага борган. Эркакда астма бўлгани сабаб касалхонага ётқизилган, аёлига эса жавоб бериб юборилган.
Натижада катта Бейкерда коронавирус аниқланган. Фарзандлар бу ҳақда онасига айтмасдан уни ҳам ҳар эҳтимолга қарши шифохонага ётқизишга қарор қилишган. Орадан 45 дақиқа ўтгач шифокорлар қўнғироқ қилиб, Эдрианнинг ҳам аҳволи оғир эканлигини маълум қилишган.
Охир-оқибат беморларнинг яқинлари эр-хотинни сунъий нафас олдириш аппаратидан узиб қўйишга қарор қилиб, уларнинг табиий йўл билан вафот этишига имкон яратиб беришган.
Аввалроқ АҚШда 65 йил бирга яшаган чол-кампир коронавирус оқибатида бир кунда вафот этгани ҳақида хабар берилганди.
Изоҳ (0)