Ирландия бош вазири Лео Варадкар мамлакатда коронавирус тарқалишига қарши кураш йўлида ҳафтасига бир маротаба Миллий санитария хизматида (HSE) шифокор бўлиб ишлайди. Бу ҳақда ирланд ҳукуматининг расмий вакилига таяниб, The Guardian хабар берди.
Таъкидланишича, Варадкар март ойида амалиёт ўташ ҳуқуқига эга тиббиёт ходимларининг расмий рўйхати — тиббиёт реестрига киритилган. «У ўз соҳасига кирадиган йўналиш бўйича ҳафтасига бир марта HSE’да ишлаш таклифини билдирган», — дейди газета суҳбатдоши.
Варадкар сиёсат билан шуғуллангунига қадар етти йил шифокор бўлиб ишлаган. 2010 йилда у умумий амалиёт бўйича диплом олган. Орадан уч йил ўтгач, Варадкар тиббиёт реестридан чиққан эди.
Irish Times нашрининг маълумотларга кўра, бош вазир ҳафтасига бир марта телефон орқали дастлабки текширувларни ўтказади. Таъкидланишича, Варадкарнинг отаси шифокор, онаси — ҳамшира, икки синглиси ҳам тиббиёт соҳасида ишлайди.
Сўнгги маълумотларга кўра, Ирландияда COVID-19 коронавируси билан касалланганлар сони 4994 кишига етган, 158 киши вафот этган.
Эслатиб ўтамиз, ўтган бир сутка ичида дунё бўйича коронавирус билан касалланганлар сони 82 минг кишига ошди. Бутун дунёда вирусга чалинганлар сони 1 133 178 кишини ташкил этаётган бўлса, қурбонлар сони — 62 784 кишига етди
Изоҳ (0)