Давлат хавфсизлик хизмати ходимлари 2019 йилда чет эллардаги қайноқ нуқталарда оғир шароитда қолиб кетган ватандошларни Ўзбекистонга қайтаришда фаол иштирок этди. Бу ҳақда ДХХ вакиллари «Дарё»га маълум қилди.
Жумладан, Президент Шавкат Мирзиёев топшириғига кўра, амалга оширилган «Меҳр 1» ва «Меҳр 2» гуманитар операциялари доирасида Яқин Шарқ давлатларида оғир шароитда қолаётган аёллар ва болаларни Ўзбекистонга олиб келишда хизмат ходимлари фаоллик кўрсатган.
«Шунингдек, Давлат хавфсизлиги хизмати томонидан ёт ғоялар таъсирида Афғонистонда қийин ҳолатга тушиб қолган ўнлаб ўзбекистонликлар ўз яқинлари бағрига қайтарилган», — дейилади хизмат ахборотида. Айнан неча киши ва қачон қайтарилганига аниқлик киритилмаган.
Маълумот учун, 5 апрель Ўзбекистонда Давлат хавфсизлик хизмати куни сифатида нишонланади.
Эслатиб ўтамиз, 2019 йил май ойида «Меҳр 1» операцияси доирасида Суриядан 156 нафар ўзбекистонлик, асосан аёллар ва болалар, 2019 йил октябрида эса «Меҳр 2» операцияси доирасида Ироқдан 64 нафар бола Ўзбекистонга қайтарилган эди.Ўзбекистон Президенти Шавкат Мирзиёев Яқин Шарқдаги қуролли можаралар ҳудудидан ватандошларни қайтариш операциялари ҳақида тўхталар экан, бир давлат Суриядан қайтаётган Ўзбекистон самолётини уриб тушириш билан таҳдид қилганини маълум қилган эди.
Изоҳ (0)