Ўзбекистонда карантин сабабли савдо шохобчалари ёпилаётган бир шароитда зарурий озиқ-овқат ҳисобланмайдиган спиртли ичимликлар дўконлари фаолият олиб бормоқда. Ички ишлар вазирлиги ахборот хизмати раҳбари Шоҳрух Ғиёсов мазкур ҳолатга изоҳ берди.
Ички ишлар вазирлиги вакилининг сўзларига кўра, агар спиртли ичимликларнинг ёки сигарет маҳсулотларининг савдоси тўхтатиб қўйилса, одамлар бу маҳсулотни уйда қўлбола тайёрлашни бошлайди. Бу эса, ўз навбатида, кўплаб заҳарланиш ҳолатларига олиб келади. Одамларнинг қўлбола спиртли ичимликдан заҳарланиб ўлиши айни дамда ортиқча муаммо ҳисобланади.
Қайд этилишича, тарихда бундай ҳолат кузатилган. 1980 йилларда Собиқ Иттифоқ ҳукумати «сухой закон» эълон қилган, яъни спиртли ичимликларни ишлаб чиқариш ва савдоси тўхтатилган. Шу даврда одамларнинг қўлбола тайёрланган спиртдан заҳарланиб ўлиши 400 фоизга ошган.
Эслатиб ўтамиз, коронавирус сабабли Ўзбекистонда озиқ-овқат дўконлари ва деҳқон бозорларидан бошқа барча савдо мажмуалари, умумий овқатланиш шохобчалари ёпилган.
Изоҳ (0)