Бирлашган Араб Амирликларида коронавирус билан касалланиш бўйича яна 150 та ҳолат қайд этилди. Мамлакатда вирус юқтириб олганлар 814 кишига етган. Бу ҳақда мамлакат Соғлиқни сақлаш вазирлигига таяниб, «РИА Новости» хабар берди.
«Соғлиқни сақлаш ва профилактика вазирлиги 1 апрель ҳолатига кўра, БААда яна 150 кишида коронавирус аниқланганини маълум қилди. Касалларнинг умумий сони 814 кишига етди», — дейилади хабарда.
Идоранинг қўшимча қилишича, коронавирус оқибатида яна икки киши вафот этган. Пандемия бошланганидан буён БААда жами саккиз киши вафот этди.
Сўнгги маълумотларга кўра, дунё бўйлаб коронавирус билан касалланганлар сони 947 минг кишидан, вафот этганлар 47 минг кишидан ошган. Аввалроқ Жаҳон соғлиқни сақлаш ташкилоти коронавирусдан тузалганлар сонини эълон қилишни тўхтатгани ҳақида хабар берилганди.
Эслатиб ўтамиз, март ойининг охирларида БАА Ўзбекистонга ижтимоий ёрдам жўнатган эди. БМТ бош котиби коронавирусга қарши курашиш учун жаҳон ЯИМининг 10 фоизи миқдорида пул чоп этишни таклиф қилди. Оқ уй экспертлари коронавирус оқибатида 2,2 миллион америкалик вафот этиши мумкинлигини тахмин қилмоқда. Ўзбекистонда эса коронавирус билан касалланганлар сони 187 кишига етди.
Изоҳ (0)