Дунёдаги энг йирик самолёт ишлаб чиқарувчи компаниялардан бири бўлган Airbus шифокорлар учун махсус ниқоблар — бутун юзни ҳимоя қиладиган пластик экранлар ишлаб чиқаришни бошлаганини эълон қилди.
«Коммерсантъ»нинг ёзишича, компания бундай ниқобларни ўзининг Испаниядаги заводларида 20 дан ортиқ 3D принтер ёрдамида чоп этади. Ниқоблар биологик парчаланадиган махсус пластмассадан тайёрланган.
Airbus’да юзлаб шундай ниқоблар ишлаб чиқарилгани, улар компания заводлари яқинидаги касалхоналарга юборилгани қайд этилган.
Коронавирус шароитида зарур бўлган турли ҳимоя воситалари ва мосламалар бошқа кўплаб компаниялар томонидан ҳам ишлаб чиқарилмоқда. Balenciaga, Yves Saint Laurent ва Ralph Lauren тиббий ниқоблар ва ҳимоя кийимлари ишлаб чиқаришни бошлади, LVMH ўз заводларини қўл учун антисептик гелларни ишлаб чиқаришни йўлга қўйди, Британиянинг маиший электроника ишлаб чиқарувчи Dyson компанияси соғлиқни сақлаш хизмати мутахассислари билан ҳамкорликда янги сунъий нафас олдириш аппаратини яратди.
Вирус тарқалишини реал вақт режимида кузатиб борувчи Жон Ҳопкинс университети маълумотларига кўра, Испанияда COVID-19 коронавируси билан касалланганлар сони 104 мингдан, вафот этганлар эса 9 минг кишидан ошиб кетди.
Изоҳ (0)