Ўзбекистонда коронавирусга чалинганларнинг қайси ҳудудларда даволанаётгани маълум қилинди

Ўзбекистонда коронавирусга чалинганлар 158 нафарни ташкил этмоқда. Уларнинг 92 нафари (шундан 7 нафари соғайган, бир нафари вафот этган) Тошкентдаги Вирусология илмий-текшириш институти клиникасида, қолган 66 нафари (шундан бир нафари вафот этган) эса қатор вилоятлардаги шифохоналарда даволанмоқда. Бу ҳақда Соғлиқни сақлаш вазирлиги хабар берди.

Фарғона вилоятида коронавирус инфекциясига чалинган 26 нафар бемор вилоят юқумли касалликлар шифохонасида даволанмоқда. Фарғона ушбу кўрсаткич билан Тошкент шаҳридан кейинги ўринда турибди. Уларнинг 9 нафари фарғоналик. Қолган 4 нафари андижонлик, 1 нафари жиззахлик, 3 нафари самарқандлик,7 нафари пойтахтлик, 2 нафари Тошкент вилоятидан. Касалликка чалинганларнинг 17 нафари шу йилнинг 25 март куни Туркиядан Фарғонага чартер рейсда келган йўловчилар орасида аниқланган. Шу куниёқ улар стационар карантинга олиниб, касаллик тасдиқлангач, ихтисослашган тиббиёт муассасасига ўтказилган.

Наманган вилоятида эса 15 кишида ушбу инфекция аниқланган. Уларнинг 13 нафари вирусни 12 ва 13 март кунлари Туркия сафарида бўлиб қайтган икки нафар коронавирус инфекцияси билан касалланган фуқародан юқтириб олган. Айни пайтда беморлар вилоятдаги юқумли касалликларга ихтисослашган шифохонада даволанмоқда. Бир нафар бемор вафот этган.

Андижон вилоятида 8 нафар бемор бор ва уларнинг барчаси андижонликлар ҳисобланади. Бундан ташқари бошқа вилоятларда яна 6 нафар андижонлик бемор мавжуд — 2 нафари Бухорода, 4 нафари эса Фарғонада вилоят юқумли касалликлар шифохонасида даволанмоқда.

Ҳозирда бир нафар хоразмликда ушбу инфекция тасдиқланган. Аммо вилоят юқумли касалликлар шифохонасида бундан ташқари, яна 5 нафар бемор даволанмоқда. Уларнинг 2 нафари сурхондарёлик, 1 нафари бухоролик, 1 нафари қорақалпоғистонлик, 1 нафари эса фарғоналик ҳисобланади.

Бухоро вилоятида 8 нафар, жумладан, Андижон ва Самарқанд вилоятларидан 2 нафардан, Қорақалпоғистон Республикаси, Сурхондарё вилояти ҳамда Тошкент шаҳри ва Тошкент вилоятидан 1 нафардан бемор даволанмоқда. Уларнинг 4 нафари 22 март куни Истанбул—Бухоро чартер рейсида ва яна 4 нафари эса 24 март куни Москва—Бухоро чартер рейсида келган ва карантинга олинган, касаллиги тасдиқланиб, вилоят юқумли касалликлар шифохонасида даволанмоқда.

Юқорида таъкидланганидек, Москвадан чартер рейсда келиб, касаллиги тасдиқланган 2 нафар бухоролик пойтахтда ва 22 мартда Москвадан чартер рейсда Урганчга учган бир нафар ушбу вилоят фуқароси Хоразм юқумли касалликлар шифохонасида даволанмоқда.

Айни вақтгача уч нафар қашқадарёликда ушбу инфекция аниқланган. Шундан бемор билан мулоқот орқали ушбу инфекцияга чалиниб, бир нафар фуқаро вилоят юқумли касалликлар шифохонасида даволанаётган бўлса, қолган 2 нафари 21 ва 28 март кунлари Москвадан келган шаҳрисабзлик ва яккабоғлик фуқаролар ҳисобланади. Улар пойтахтдаги Вирусология илмий текшириш институти клиникасида муолажа олмоқда.

Навоий вилоятида ҳам 2 нафар бемор бўлиб, улар асли ушбу ҳудуддан бўлган ва касалликка чалинган бемор билан мулоқотда бўлгани сабабли вирусни юқтириб олган ҳамда вилоят юқумли касалликларга ихтисослашган муассасада даволанмоқда.