30 март, душанба куни, соат 13:30 да АОКА ҳузуридаги штабда ички ишлар вазири матбуот котиби Шоҳрух Ғиёсов иштирокида брифинг ўтказилди.
Унда Юнусобод туманида тўй маросимини ўтказган отахонга нисбатан қандай чора кўрилгани, зарур ҳолатларда қариндошлардан ташқари ҳеч кимни таклиф этмасдан «ими-жимида» кичик йиғинларни ўтказиб юбориш мумкинми, дея савол берилди.
ИИВ матбуот котибининг билдиришича, ҳақиқатан ҳам, 28 март куни Тошкент шаҳри Юнусобод туманида яшовчи фуқаро бир кун олдин профилактика инспектори ва маҳалла раиси томонидан бундай тадбир ўтказиш карантин қоидаларини қўпол равишда бузиш эканлиги ҳақида расмий равишда тилхат олиб огоҳлантирилганига қарамай, қизини узатиш мақсадида «куёв-навкар» маросимини ўтказган, тадбирга ўзининг қариндошлари, куёв ва унинг дўстларини таклиф этган.
Ҳозирда ушбу фуқарога нисбатан Жиноят кодексининг 257-1-моддаси, яъни эпидемияга қарши кураш қоидаларини бузиш билан жиноят иши қўзғатилган.
«‘Ими-жимида’ тўй маросимини ёки бошқа йиғинларни ўтказиш тақиқланган. Агар ички ишлар органлари тўй ёки бошқа маросимларни ўтказаётганингизни аниқласалар, сиз жиноий жавобгарликка тортиласиз. Албатта, дафн маросимлари бундан мустасно», — дея жавоб берган Шоҳрух Ғиёсов ва фуқаролардан карантин қоидаларига қатъий риоя қилишларини сўраган.Аввалроқ Тошкентда карантинга қарамай куёв-навкар ўтказган келиннинг отасига жиноий иш қўзғатилгани хабар берилган эди.
Изоҳ (0)