Сирдарё вилояти Сардоба туманида жойлашган озиқ-овқат дўконида 28 март, шанба куни, соат 14:50 ларда 28 ёшли Д.А. сотувчи бўла туриб, карантин қоидаларини бузганлиги аниқланди.
ИИВ матбуот хизматининг хабарига кўра, у кириш-чиқиш жойларини қўл ювиш ёки антисептик воситалар билан жиҳозламаган, ҳимоя қўлқопларида бўлмай, тозаликка риоя қилмаган.
Шу сабабли Маъмурий жавобгарлик тўғрисидаги кодекснинг 54-моддаси (Эпидемияларга қарши кураш қоидаларини бузиш)га кўра, маъмурий жавобгарликка тортилган.
Ушбу моддада белгиланган ҳаракатларни содир этганлик учун базавий ҳисоблаш миқдорининг 5 бараваригача (27 март ҳолатига кўра, 1 115 000 сўм) миқдорда жарима солишга сабаб бўлади.
Эслатиб ўтамиз, Шавкат Мирзиёев эпидемияга қарши кураш қоидаларини бузганда жавобгарлик кучайиши тўғрисидаги қонунни имзолаганди. Қонунга кўра, карантин қоидаларини бузганлик учун жазо кучайтирилди ва жарималар миқдори бир неча баробар оширилди. Юқумли касаллик ҳақида ёлғон маълумот тарқатганлик учун жиноий жавобгарлик жорий этилди.
Шунингдек, Президент коронавирус масаласида Ўзбекистон халқига яна бир бор мурожаат қилди. Ўзбекистонга коронавируснинг кириб келиши ва тарқалишининг олдини олиш бўйича махсус комиссия коронавирусга қарши карантин қоидаларига риоя қилишни сўраб мурожаат йўллади.
Аввалроқ Ўзбекистонда карантин қоидаларига амал қилмаслик билан боғлиқ жами 12 484 та ҳолат аниқлангани хабар берилганди. Унга кўра, Сирдарё вилоятида 16 мартдан буён бугунги кунга қадар карантин қоидаларига амал қилмаслик билан боғлиқ жами 456 та ҳолат қайд этилган.
Изоҳ (0)