Ўзбекистонда 30 март куни соат 6:00 дан бошлаб Тошкент ва Нукус шаҳарлари, вилоятлар марказларида махсус стикер (рухсатномасиз) автотранспортни бошқариш тақиқланиши эълон қилинган эди. 30 март куни Тошкентдаги айрим Давлат хизматлари марказлари ва Халқ қабулхоналарида 1 апрелга қадар рухсатномасиз автомобилда юришга рухсат берилгани ҳақида эълонлар пайдо бўлди.
Эълонларда кўрсатилишича, махсус стикер (рухсатнома) олиш жараёни Ягона портал — «My.gov.uz» орқали амалга оширилади. Бундан ташқари, фойдаланувчилар йўллаган видеохабарларда Тошкентдаги ДХМ ва Халқ қабулхоналари олдида тўпланганларга масъуллар тақиқ ҳозирча амал қилмаслиги, бемалол автомобилда ҳаракатланиш мумкинлиги айтаётганини кўриш мумкин.
Ушбу хабарларни Давлат хизматлари агентлиги рад этиб чиқди. Маълум қилишларича, «Давлат хизматлари марказларига жойлаштирилган махсус рухсатнома бериш 1 апрелга қадар талаб этилмаслиги ҳақидаги эълон... расмий асосга эга эмас». Алоҳида қайд этишларича, «ҳозирда ушбу эълон марказлардан олиб ташланган».
Ўз навбатида, ИИВ матбуот хизмати шахсий автомобилларда ҳаракатланиш бўйича аввал эълон қилинган тартибга доир ҳеч қандай ўзгариш бўлмагани, махсус стикер (рухсатнома)сиз ҳаракатланаётган транспорт воситалари ҳайдовчилари 30 март куни соат 6:00 дан бошлаб маъмурий жавобгарликка тортилаётганини «Дарё»га маълум қилди.
Изоҳ (0)