Тошкент шаҳар ҳокимлигида саховатпеша инсонларнинг ёрдамларини етказиб бериш бўйича марказ ташкил этилди

Тошкент шаҳар ҳокимлигида саховатпеша инсонлар томонидан кўрсатилаётган ёрдамларни амалга оширишда юзага келадиган қийинчиликларни бартараф этиш мақсадида мувофиқлаштирувчи марказ ташкил этилди. Бу ҳақда пойтахт ҳокимлиги матбуот хизмати хабар берди.

30 март куни соат 06:00 дан 20 апрель соат 00:01 га қадар Тошкент шаҳрида автотранспорт воситаларини ҳаракати махсус рухсатномалар билан амалга оширилиши муносабати билан саховатпеша инсонлар томонидан кўрсатилаётган ёрдамлар масаласида қийинчиликлар вужудга келиши мумкин.

Кўнгиллиларнинг хайрли ишлари ўз вақтида манзилли амалга ошишига кўмаклашиш мақсадида Тошкент шаҳар ҳокимлигида мувофиқлаштирувчи марказ ташкил этилди.

Марказ қуйидаги тартибда иш фаолиятини амалга оширади:

• давлат ва жамоат ташкилотлари, депутатлар, тадбиркорлар, ёрдам кўрсатишни истаган фаол фуқаролар марказга манзилли ёрдам кўрсатиш бўйича мурожаат этади;
• марказдан мурожаат бўйича маълумот туман ҳокими ўринбосарларига етказилади;
• туман ҳокими ўринбосарлари ёрдам кўрсатиш истагини билдирганлар билан ҳамкорликда манзилли ёрдамни ташкил этади.

Марказга ҳар куни соат 10:00 дан 17:00 га қадар (71) 210-01-15 ва (71) 210-01-16 телефон рақамлари орқали мурожаат этиш мумкин.Эслатиб ўтамиз, республика махсус комиссияси томонидан шахсий транспортдан фойдаланишга чеклов қўйилгани ҳақида хабар берилганди. Ўзбекистонда вилоятлараро, Тошкент ва Нукус шаҳарлари ҳамда вилоятлар марказларида 30 март соат 06:00 дан 20 апрель соат 00:01 га қадар Давлат хизматлари марказлари томонидан бериладиган махсус рухсатнома (стикер)лар асосида автотранспорт воситалари ҳаракатланишига рухсат берилади. Ҳуқуқбузар фуқароларга нисбатан Маъмурий жавобгарлик тўғрисидаги кодекснинг 54-моддаси асосида жарима қўлланилади.