Қашқадарёда карантин вақтида картошка ва ун нархи ошиши кузатилди

Карантин пайтида Қашқадарё вилоятида картошка ун ва нархи ошиши кузатилган. «Дарё» мухбирининг хабар беришича, бу ҳақда вилоят ҳокими Зоир Мирзаев маълум қилди.

Аниқланишича, вилоят раҳбари бу ҳақда вилоятда коронавирусга қарши курашиш ҳақида маълумот бериш чоғида таъкидлаб ўтган.

«Карантин пайтида вилоятимизда картошка ва ун нархи ошгани кузатилмоқда. Бунинг олдини олиш мақсадида куни кеча вилоятга икки вагон картошка маҳсулоти келтирилди. Эндиликда ҳар икки кунда Қарши шаҳрига икки вагондан картошка келиши давом этади. Илгари биржа савдоларига 640 тонна ун чиқарилган бўлса, бугунги кунга келиб биржада 940 тонна ун сотилмоқда. Айни кунда озиқ-овқат дўконларидаги ун нархи 135-140 минг сўмни ташкил этади. Шунингдек, ‘Қаршига кириш тақиқланган’, ‘ёқилғи нархи ошиб кетди’, деган асоссиз баҳоналар пайдо бўлмаслиги учун озиқ-овқат ташувчи юк автомобилларига шаҳарга кириб-чиқишга рухсат берилади», — деди вилоят раҳбари.

Таъкидланишича, шаҳар ва туманларда ичимлик суви ташиб келтирилиши ҳисобга олинган ҳолда сув ташувчи техникаларга ҳам шаҳарга кириш ва чиқишда тақиқ қўйилмайди.

«Ичимлик сувини ташишда муаммо бўлмайди. Вилоят ташкилотларига тегишли 35 та сув ташувчи тахника ҳам аҳолига ўз вақтида сув келтириб бериш учун жалб қилинган», — деди Зоир Мирзаев.

Маълум бўлишича, вилоятдаги умумий овқатланиш жойлари, кафе, бар ва тўйхоналар фаолиятини тўхтатишни назорат қилиш ва тезкор қонуний чоралар кўриш мақсадида ишчи гуруҳ ташкил этилиб, уларга 20 та Damas ва 40 нафар инспектор сафарбар қилинган.

Қўшимча қилинишича, вилоятда 60 ёшдан ошган, эҳтиёжманд, сурункали касалликка чалинган фуқароларни қўллаб-қувватлаш учун уларга бепул озиқ-овқат маҳсулотлари, ҳимоя ва гигиеник воситалар тўплами етказиб берилади. Айни пайтда вилоятда бундай кишилар 441 нафарни ташкил этади.