Хонанда Муниса Ризаева карантин пайтида жамоат жойида бўлиш қоидасини бузиб, ниқобсиз юргани учун жавобгарликка тортилди. Бу ҳақда Ўзбекистон маданият вазирлиги матбуот хизмати хабар берди.
Муниса Ризаева 26 март куни Instagram’даги саҳифасига қурилиш компанияси сотув офисига бориб, офис ходимлари билан ниқоб тақмасдан мулоқотда бўлгани акс этган видеони жойлаштирган. У ниқобсиз юрганини алоҳида, катта ҳарфлар билан ёзиб қолдирган. Бу ҳолат кенг муҳокамаларга сабаб бўлди. Ижтимоий тармоқ фойдаланувчилари «Ниқоб тақиш мажбурияти ҳаммага эмасми, хонандалар ниқобсиз юриши мумкинми?» қабилидаги саволларни ёзиб қолдирган эди.
«Маданият вазири Озодбек Назарбеков коронавирус пандемиясига қарши курашишда давлат раҳбари ва ҳукумат томонидан ишлаб чиқилаётган зарурий чоралар Ўзбекистондаги барча фуқароларга тегишли эканлигини таъкидлади.
Ўз навбатида Муниса Ризаева бу ҳолат юзасидан изоҳ бериб, қайта такрорланмаслигига ваъда берди», — дейилади вазирлик хабарида.
Эслатиб ўтамиз, Ўзбекистон Президенти томонидан 2020 йил 26 мартда имзоланган қонунга асосан Маъмурий жавобгарлик тўғрисидаги кодексга ўзгартиш ва қўшимчалар киритилди. Ушбу кодекснинг 54-моддасига киритилган ўзгартиришларга кўра, карантинли ва инсон учун хавфли бўлган бошқа юқумли касалликлар пайдо бўлиши ҳамда тарқалиши шароитида ваколатли органнинг махсус талабларига зид равишда жамоат жойларида ниқобсиз бўлиш базавий ҳисоблаш миқдорининг беш бараваригача (27 март ҳолатига, 1 115 000 сўм) миқдорда жарима солишга сабаб бўлади.
Изоҳ (0)