27 март, жума куни, соат 16:30 да Андижон шаҳар марказий поликлиникасида ёнғин рўй берди. Ёнғин оқибатида ҳеч ким жабрланмаган. Бу ҳақда Соғлиқни сақлаш вазирлиги хабар берди.
Маълум қилинишича, шаҳар аҳолисига бирламчи тиббий-санитария ёрдамини кўрсатувчи мазкур тиббиёт муассасаси карантин муносабати билан санитария талаблари асосида иш фаолиятини чегараланган ҳолда олиб бораётган эди.
Маълумотларга кўра, 5 қаватли поликлиника биносининг 4-қаватидаги бош ҳамшира хонасида жойлашган совитгич ва компьютерларнинг электр тармоғига уланган жойида қисқа туташув рўй бериб, қисқа фурсатли ёнғин юз берган. Поликлиникадаги тиббиёт ходимлари ва беморлар зудлик билан ташқарига чиқарилган.
Тезкор ҳаракатлар ва поликлиника шифокорларининг фаоллиги туфайли ҳеч ким жароҳат олмаган. Катта миқдордаги моддий зарар етказилмаган. Айни пайтда ўрнатилган тартибда суриштирув ишлари олиб борилмоқда.
Ёнғин марказий поликлиника фаолиятига таъсир этмаган. Фаолият бўйича хизматлар Андижон шаҳрининг бошқа мавжуд 8 та оилавий поликлиникаларига тақсимланди.
Эслатиб ўтамиз, Ўзбекистонда коронавирусга чалинганларнинг 3 нафари Андижон вилоятларидаги юқумли касалликлар шифохоналарида даволанмоқда. Андижон шаҳрига кириш-чиқиш эса 27 мартдан бошлаб ёпилган.
Изоҳ (0)