27-mart, juma kuni, soat 16:30 da Andijon shahar markaziy poliklinikasida yong‘in ro‘y berdi. Yong‘in oqibatida hech kim jabrlanmagan. Bu haqda Sog‘liqni saqlash vazirligi xabar berdi.
Ma’lum qilinishicha, shahar aholisiga birlamchi tibbiy-sanitariya yordamini ko‘rsatuvchi mazkur tibbiyot muassasasi karantin munosabati bilan sanitariya talablari asosida ish faoliyatini chegaralangan holda olib borayotgan edi.
Ma’lumotlarga ko‘ra, 5 qavatli poliklinika binosining 4-qavatidagi bosh hamshira xonasida joylashgan sovitgich va kompyuterlarning elektr tarmog‘iga ulangan joyida qisqa tutashuv ro‘y berib, qisqa fursatli yong‘in yuz bergan. Poliklinikadagi tibbiyot xodimlari va bemorlar zudlik bilan tashqariga chiqarilgan.
Tezkor harakatlar va poliklinika shifokorlarining faolligi tufayli hech kim jarohat olmagan. Katta miqdordagi moddiy zarar yetkazilmagan. Ayni paytda o‘rnatilgan tartibda surishtiruv ishlari olib borilmoqda.
Yong‘in markaziy poliklinika faoliyatiga ta’sir etmagan. Faoliyat bo‘yicha xizmatlar Andijon shahrining boshqa mavjud 8 ta oilaviy poliklinikalariga taqsimlandi.
Eslatib o‘tamiz, O‘zbekistonda koronavirusga chalinganlarning 3 nafari Andijon viloyatlaridagi yuqumli kasalliklar shifoxonalarida davolanmoqda. Andijon shahriga kirish-chiqish esa 27-martdan boshlab yopilgan.
Izoh (0)