Ўзбекистон Президенти Шавкат Мирзиёев ташаббусига асосан, Иқтисодиёт ва саноат вазирлиги Иқтисодий тараққиёт ва камбағалликни қисқартириш вазирлигига айлантирилиши ҳақида хабар берилган эди.
Мазкур вазирлик раҳбари Жамшид Қўчқоровга ўринбосарлар тайинланди. Бу ҳақда вазирлик томонидан хабар берилди.
Маълум қилинишича, Илҳом Норқулов иқтисодий тараққиёт ва камбағалликни қисқартириш вазири биринчи ўринбосари этиб тайинланди. Бунга қадар Илҳом Норқулов Марказий банк раисининг биринчи ўринбосари лавозимида ишлаб келган.
Шунингдек, Акмалхон Ортиқов ҳам иқтисодий тараққиёт ва камбағалликни қисқартириш вазирининг биринчи ўринбосари лавозимига тайинланган. Тайинловга қадар Акмалхон Ортиқов Вазирлар Маҳкамаси Макроиқтисодий таҳлил, таркибий ўзгартиришлар, молия-банк тизими ва хусусий тадбиркорлик масалалари котибиятининг мудири лавозимида фаолият юритган.
Бобур Абдуназаров иқтисодий тараққиёт ва камбағалликни қисқартириш вазирининг ўринбосари лавозимини эгаллади. Бобур Абдуназаров мазкур тайинловга қадар Молия вазирлиги Тариф сиёсати ва давлат корхоналарини ислоҳ қилиш департаменти директори лавозимида ишлаган.
Шу кунга қадар Молия вазирлигининг Давлат ривожлантириш дастурларини молиявий таъминлаш департаменти директори лавозимида ишлаб келган Адиз Бобоев ҳам иқтисодий тараққиёт ва камбағалликни қисқартириш вазирининг ўринбосари лавозимига тайинланди.
Иқтисодиёт ва саноат вазирининг биринчи ўринбосари лавозимида ишлаб келган Олимхон Рустамов ҳам иқтисодий тараққиёт ва камбағалликни қисқартириш вазирининг ўринбосари лавозимини эгаллади.
Изоҳ (0)