Актриса Мадина Мухторова ва унинг ўғлига нисбатан очилган жиноят иши тугатилди

Жиноят ишлари бўйича Юнусобод туман судида 19 март куни Ўзбекистон Республикаси Жиноят кодексининг 109-моддаси (қасддан баданга енгил шикаст етказиш) 2-қисми билан гумон қилинувчилар актриса Мадина Мухторова ва унинг ўғли Санжар Мухторовга оид жиноят иши кўриб чиқилди. Бу ҳақда Олий суд матбуот хизмати раҳбари Азиз Обидов «Дарё»га хабар берди.

Судда гумонланувчи Мадина Мухторова ва Санжар Мухторов ярашув тўғрисида ариза тақдим қилиб, қилмишидан пушаймонлиги, содир этган қилмишининг оқибатларини англаганлиги, жабрланувчига етказилган зарарни тўлиқ қоплаганлиги, ҳозирда жабрланувчи билан ярашиб олганлиги ҳақида кўрсатма бериб, жиноят ишини тугатишни сўраган.

Жабрланувчининг қонуний вакили Д.Йўлдошева жабрланувчи Мирфайз Алимжонов билан судда ярашув тўғрисидаги ариза тақдим қилиб, гумонланувчи Мадина Мухторова ва Санжар Мухторовга нисбатан ҳеч қандай даъвоси йўқлиги, етказилган зарар тўлиқ қопланганлиги, ярашув суд томонидан тасдиқланганидан кейин келиб чиқадиган ҳуқуқий оқибатларни тушунганини, жиноят ишини тугатишни сўраган.

Фуқаровий даъвогар Мирфайз Алимжонов судда ярашув тўғрисидаги аризани тақдим қилиб, гумонланувчи Мадина Мухторова ва Санжар Мухторовга нисбатан ҳеч қандай даъвоси йўқлиги, етказилган зарар тўлиқ қопланганлиги, ярашув суд томонидан тасдиқланганидан кейин келиб чиқадиган ҳуқуқий оқибатларни тушунганини, жиноят ишини тугатишни сўраган.

Ўзбекистон Республикаси Жиноят кодексининг 66-1-моддаси (ярашилганлиги муносабати билан жиноий жавогарликдан озод қилиш)га мувофиқ, Жиноят кодексининг 109-моддаси (қасддан баданга енгил шикаст етказиш)нинг 2-қисмида назарда тутилган жиноятни содир этган шахс ўз айбига иқрор бўлган бўлса, жабрланувчи билан ярашса ва етказилган зарарни бартараф этса, ярашганлиги муносабати билан жиноий жавобгарликдан озод этилиши мумкин.

Суд жабрланувчининг қонуний вакили, фуқаровий даъвогар ва гумонланувчиларнинг ярашув тўғрисидаги аризаларини жиноят иши ҳужжатлари билан ўрганиб, Юнусобод туман прокурори ёрдамчисининг жиноят ишини ярашганлик муносабати билан тугатиш ҳақидаги фикрини эшитиб, гумонланувчиларнинг айбига иқрорлиги, етказилган зарарнинг тўлиқ қопланганлиги, ярашув гумонланувчи, фуқаровий даъвогар ва жабрланувчининг қонуний вакили бирон-бир тазйиқсиз, ўз хоҳиши билан бўлаётганлиги ҳамда Ўзбекистон Республикаси Жиноят кодексининг 109-моддаси (қасддан баданга енгил шикаст етказиш)нинг 2-қисмида назарда тутилган жиноят, Жиноят кодексининг 66-1-моддасига мувофиқ, ярашувга тушишини инобатга олиб, Мадина Мухторова ва Санжар Мухторовга нисбатан жиноят ишини ярашганлик муносабати билан тугатишни лозим топган.

«Шунга кўра, жиноят ишлари бўйича Юнусобод туман суди судьяси Э.Шамсутдинова Ўзбекистон Республикаси Жиноят кодексининг 109-моддаси (қасддан баданга енгил шикаст етказиш) 2-қисми би­лан гумон қилинувчи Мадина Мухторова ва Санжар Мухторовга нисбатан жиноят иши ярашилганлиги муносабати билан тугатиш ҳақида ажрим чиқарди.

Жабрланувчи, жабрланувчининг қонуний вакили ва фуқаровий даъвогарга ушбу иш бўйича иш юритиш­ни қайта тиклаш юзасидан илтимоснома бериш ҳуқуқи йўқолганлиги тушунтирилган», — дейилади хабарда.

Эслатиб ўтамиз, 2020 йилнинг январида актриса Мадина Мухторованинг бир ўғли бошқа ўғли томонидан калтакланиши ҳолати ижтимоий тармоқларда кенг муҳокама қилинган эди. Ижтимоий тармоқлар фойдаланувчилари ҳамда болалар ҳуқуқларини ҳимоя қилиш билан шуғулланувчи жамоатчилик вакилларининг мурожаатлари эътиборга олиниб, ушбу ҳолат юзасидан Мадина Мухторова ва унинг ўғли Санжар Мухторовга нисбатан жиноят иши қўзғатилган эди.