Марказий ҳарбий округда 27 март, жума куни, муддатли ҳарбий хизматни ўтаган аскарларни ўз уйларига кузатиш маросими бўлиб ўтди. Бу ҳақда Марказий ҳарбий округ матбуот хизмати «Дарё»га маълум қилди.
Хабар берилишича, аскарларни уйларига кузатиш тадбирлари 20 мартдан 10 апрель кунига қадар ўтказилиши кўзда тутилган эди. Коронавирус сабабли фақат бир кун — 27 март куни республиканинг барча йўналишлари бўйлаб махсус рейслар йўлга қўйилди.
Тадбирда округ қўмондони полковник Ойбек Саидов, ҳарбий қисм шахсий таркиби, Самарқанд гарнизони Маънавият ва маърифат маркази ҳарбий оркестри иштирок этди.
Марказий ҳарбий округига қарашли Самарқанд, Жиззах ҳамда Навоий гарнизонларида бир йиллик хизматни ўтган жами 280 нафар аскарга олий ҳарбий таълим муассасасига кириш учун имтиёзли тавсиянома берилди. Улардан 40 нафари ўз истагига кўра, шартнома асосида ҳарбий хизматда қолди. Янги ташкил этилган Спорт взводида хизмат қилган 10 га яқин спортчи аскар округ ҳамда Мудофаа вазирлиги номидан халқаро тоифадаги спорт мусобақаларида қатнашиб, совриндор бўлди.
Қайд этилишича, округ қўмондонлиги ўз оиласи бағрига қайтаётган аскарлардан маҳалла ва яқинлар учун зиёфат уюштирмасликни сўради.
Муддатли ҳарбий хизматчилар махсус рейс билан 27 март куни тунда қатъий назорат остида Самарқанд—Тошкент—Анжидон ҳамда Бухоро—Нукус йўналишида ўз уйларига кузатилади.
Эслатиб ўтамиз, коронавирус сабабли Ўзбекистонда армияга чақирув вақтинча қолдирилди. Мудофаа вазирлиги карантинга олинган ҳудудларда назорат кучайтирилганини маълум қилди.
Изоҳ (0)