Ўзбекистон Президенти Шавкат Мирзиёев ва ҳукумат аъзолари 20 март куни 89 ёшида вафот этган академик Мухтор Саидовнинг яқинларига таъзия билдирди, деб хабар беради ЎзА.
Мухтор Саидов 1930 йил 21 ноябрда Қорақалпоғистон Республикасининг Манғит шаҳрида туғилган. 1951 йилда Хоразм давлат педагогика институтини тугатиб, 1951—1954 йилларда Москва давлат университети аспирантурасида таҳсил олган. 1954 йилда номзодлик, 1970 йилда докторлик диссертацияларини ҳимоя қилган. 1984 йилда Ўзбекистон Фанлар академиясининг ҳақиқий аъзоси этиб сайланган.
Мухтор Саидов ўз меҳнат фаолиятини 1954 йили Хоразм давлат педагогика институтида катта ўқитувчи сифатида бошлаб, кейинчалик Самарқанд давлат университетида кафедра мудири лавозимида ишлаган. Фаолияти давомида Фанлар академияси Физика-техника институтида катта илмий ходим, лаборатория мудири, директор ўринбосари, Электроника институтининг директори, Ўзбекистон Фанлар академияси президиуми Физика-математика бўлимининг академик-котиби, «Ўзгелиотехника» маркази раҳбари каби масъул вазифаларда самарали хизмат қилган.
«Заҳматкаш олимнинг яримўтказгичлар технологияси соҳасининг назарий ва амалий масалаларига бағишланган кўплаб мақолалари, китоб ва монографиялари юртимиз ва хорижий мамлакатлар илмий жамоатчилигига яхши маълум. Унинг бир қатор илмий ишланмалари иқтисодиётимиз тармоқларида муваффақиятли қўлланиб келмоқда.
Жонкуяр устоз, моҳир педагогнинг бевосита раҳбарлигида ўнлаб фан номзодлари ва фан докторлари етишиб чиққан.
Академик Мухтор Саидовнинг мамлакатимиз илм-фанини ривожлантириш борасидаги хизматлари давлатимиз томонидан муносиб баҳоланди. У ‘Ўзбекистонда хизмат кўрсатган фан арбоби’ фахрий унвони, Ўзбекистон Республикаси давлат мукофоти билан тақдирланган эди.
Атоқли олим, меҳрибон устоз, камтарин инсон Мухтор Саидовнинг хотираси қалбларимизда ҳамиша сақланиб қолади», — дейилади хабарда.
Изоҳ (0)