Олмаотада коронавирус карантини эълон қилингани муносабати билан, ҳудуддаги барча миллий боғлар ёпиб қўйилди, деб хабар бермоқда «РИА Новости» шаҳар ҳокимлиги матбуот хизмати берган маълумотга таяниб.
«Коронавирус тарқалишининг олдини олиш мақдадида 2020 йил 21 мартдан бошлаб Олмаотада жойлашган барча миллий боғлар вақтинча ёпилади», — дейилади ҳокимлик хабарида.
Қайд этилишича, Қозоғистонда коронавирус билан касалланганлар сони 52 кишига етган. Улардан 22 нафари Олмаотада, 28 нафари — Нур-Султонда ва 2 нафари Қарағанди шаҳрида.
Ҳукумат эпидемиологик вазият барқарорлашгунга қадар туристик объектларни ёпиш ва сайёҳлик ташкилотлари фаолиятини тўхтатиб туришга қарор қилинганини ҳам эслатиб ўтган.
Бундан аввал мамлакатда оммавий тадбирлар бекор қилинди, мактаб ўқувчилари таътилга эртароқ чиқди, давлат органларига хорижга хизмат сафарига чиқиш тақиқланди. Фуқароларга қўл бериб кўришмаслик тавсия қилинди.
Мамлакатда коронавирус тарқалиши муносабати билан 16 мартдан 15 апрелга қадар фавқулодда ҳолат режими жорий қилинди. Бу даврда қозоғистонликлар мамлакатни тарк эта олмайди (хорижга даволаниш учун кетаётганлардан ташқари).
Мавзуга доир:
Изоҳ (0)