Olmaotada 21-martdan barcha milliy bog‘lar yopildi
Olmaotada koronavirus karantini e’lon qilingani munosabati bilan, hududdagi barcha milliy bog‘lar yopib qo‘yildi, deb xabar bermoqda “RIA Novosti” shahar hokimligi matbuot xizmati bergan ma’lumotga tayanib.
“Koronavirus tarqalishining oldini olish maqdadida 2020-yil 21-martdan boshlab Olmaotada joylashgan barcha milliy bog‘lar vaqtincha yopiladi”, — deyiladi hokimlik xabarida.
Qayd etilishicha, Qozog‘istonda koronavirus bilan kasallanganlar soni 52 kishiga yetgan. Ulardan 22 nafari Olmaotada, 28 nafari — Nur-Sultonda va 2 nafari Qarag‘andi shahrida.
Hukumat epidemiologik vaziyat barqarorlashgunga qadar turistik obyektlarni yopish va sayyohlik tashkilotlari faoliyatini to‘xtatib turishga qaror qilinganini ham eslatib o‘tgan.
Bundan avval mamlakatda ommaviy tadbirlar bekor qilindi, maktab o‘quvchilari ta’tilga ertaroq chiqdi, davlat organlariga xorijga xizmat safariga chiqish taqiqlandi. Fuqarolarga qo‘l berib ko‘rishmaslik tavsiya qilindi.
Mamlakatda koronavirus tarqalishi munosabati bilan 16-martdan 15-aprelga qadar favqulodda holat rejimi joriy qilindi. Bu davrda qozog‘istonliklar mamlakatni tark eta olmaydi (xorijga davolanish uchun ketayotganlardan tashqari).
Mavzuga doir:
