Туркияда коронавирус билан касалланганлар сони бир кунда қарийб икки баравар кўпайиб, 670 нафарга етди, вафот этганлар сони 9 нафарни ташкил қилмоқда, деб маълум қилди мамлакат соғлиқни сақлаш вазири Фаҳриддин Хўжа.
Фаҳриддин Хўжа 19 март куни Туркияда коронавирусга чалинганлар сони 191 кишидан 359 кишига етгани, беморларнинг 4 нафари вафот этганини маълум қилган эди.
«Сўнгги бир сутка давомида коронавирусни аниқлаш учун 3 656 та таҳлил ўтказилди. Уларнинг 311 таси ижобий чиқиб, касалланганлар сони 670 тага етди. Бугун кекса ва заифлашган беш нафар беморни йўқотдик. Умумий ҳисобда 9 киши вафот этди», — деб ёзган Хўжа Twitter’да.
Эслатиб ўтамиз, 11 март куни Туркияда коронавирус билан касалланиш бўйича дастлабки ҳолат аниқланганди. Мамлакат фуқароси Европага борганида коронавирусни юқтириб олган. У билан алоқада бўлганларнинг барчаси шифокорлар назоратига олинган. 18 март куни эса мамлакатда коронавирусдан биринчи ўлим ҳолати қайд этилган.
Ҳукумат туроператорларга коронавирус тарқалиши муносабати билан сайёҳлик мавсумини бошлашга шошилмасликни тавсия қилган. Шунингдек, коронавирус пандемияси сабабли барча мактаблар 16 мартдан бошлаб 1 ҳафтага ёпилган.
Ўзбекистонда эса коронавирусга чалинганлар сони 37 нафарга етди.
Изоҳ (0)