Олий суд раёсати томонидан қабул қилинган қарорга кўра, коронавирус тарқалишининг олдини олиш мақсадида Ўзбекистон судларида фуқароларнинг шахсий қабули, сайёр суд мажлислари тўхтатиб турилади. Бу ҳақда Олий суд матбуот хизматига таяниб, «Kun.uz» хабар бермоқда.
«2020 йил 20 март куни Ўзбекистон Республикаси Олий суди Раёсатининг йиғилиши ўтказилди. Унда ‘Ўзбекистон Республикаси судларида COVID-19 коронавирус инфекцияси тарқалишининг олдини олиш тўғрисида’ги Раёсат қарори қабул қилинди.
Ҳужжатда мамлакатимиз судларида фуқароларнинг шахсий қабули, сайёр суд мажлислари тўхтатиб турилиши, фуқароларга ҳужжатларни судларга фақат электрон шаклда ёки почта орқали юбориш тавсия этилиши назарда тутилган.
Қарорга мувофиқ, судлар томонидан фақат кечиктириб бўлмайдиган тоифадаги ишлар кўрилиши белгиланди.
Шунингдек, қарорда барча судлар ишларни техник имконият мавжуд бўлганда видеоконференсалоқа режимида кўрилишини ташкил этиши, суд мажлиси иштирокчилари бўлмаган шахсларнинг суд биноларига кириши қатъиян ман этилиши кўзда тутилган», — дейилади Олий суд матбуот хизмати раҳбари Азиз Обидов томонидан тақдим этилган маълумотда.
Эслатиб ўтамиз, Ўзбекистон ҳукуматининг коронавирус тарқалишининг олдини олиш бўйича чора-тадбирлар ҳақидаги тавсияларидан келиб чиқиб, мамлакат миқёсида оммавий кўнгилочар томошалар, байрам тадбирлари, шунингдек, Наврўз тантаналари ва у билан боғлиқ бошқа оммавий маросимлар ҳам бекор қилинган.
Изоҳ (0)