БМТ бош котиби Антониу Гутерриш Ўзбекистонда 50 мингга яқин шахсларга фуқаролик берилишига оид қонуннинг имзоланганини қўллаб-қувватлаган ва бу билан Ўзбекистонни табриклади.
«Ўзбекистон фуқаролиги йўқ шахсларга фуқаролик бериш орқали аҳолининг кўпинча эътибордан четда қоладиган ва ҳимояга муҳтож қисмининг турмушини яхшилаш томон катта қадам қўйди», — дейилади БМТ баёнотида.
Гутерриш ушбу қонунни дунё миқёсида 2024 йилгача фуқаросизликка тўлиқ барҳам бериш бўйича қилинаётган саъй-ҳаракатларга Ўзбекистон томонидан қўшилган улкан ҳисса деб баҳолади.
«Шунингдек, Барқарор ривожланиш мақсадлари бўйича ўн йиллик ҳаракатларга ўтиш арафасида турган бир пайтда ушбу воқеа Ўзбекистон ҳеч кимдан ортда қолмаслигининг қатъий исботи бўлди, дейишимиз мумкин», — дея якунланган БМТ сайтида эълон қилинган баёнот.
Эслатиб ўтамиз, Шавкат Мирзиёев 2020 йил 24 январь куни парламентга йўллаган Мурожаатномасида инсон ҳуқуқларини таъминлаш, фуқаролик тўғрисидаги қонун ҳужжатларини такомиллаштириш борасида муҳим қадам қўйиш ва мамлакатда узоқ вақтдан бери яшаб келган, бироқ Ўзбекистон фуқароси мақомини олмаган инсонлар муаммосини қонунга мувофиқ ҳал этиш юзасидан ташкилий-ҳуқуқий чора-тадбирлар кўриш зарурлигини қайд этганди.
Февраль ойининг охирида эса Олий Мажлис Сенати янги таҳрирдаги «Ўзбекистон Республикасининг фуқаролиги тўғрисида»ги қонунини маъқуллаган эди. 13 март куни эса Президент Ўзбекистон фуқаролиги тўғрисидаги қонуннинг янги таҳририни имзолади.
Қонунга мувофиқ 1995 йил 1 январга қадар Ўзбекистон ҳудудига кириб келган ва доимий пропискадан ўтган, чет давлат фуқаролигини қабул қилмаган ҳамда мазкур қонун кучга киргунига қадар фуқаролиги бўлмаган шахс Ўзбекистон фуқароси деб тан олинади.
Изоҳ (0)