Калифорния штати губернатори Гэвин Ньюсом 20 март куни коронавирус туфайли карантин режимини эълон қилди ва фуқароларга уйдан заруратсиз чиқишни тақиқлади, деб хабар бермоқда «РИА Новости».
«Ҳозирда шундай фармойиш эълон қилинган шаҳар ва округларда 21,3 миллион нафар калифорниялик яшайди. Бизникидек катта штатлар бир неча қисмлардан ташкил топган, лекин охир оқибат биз бир бутунмиз. Уйда қолиш тўғрисидаги қарорни бутун штат бўйлаб эълон қилиш учун айни пайтда талаб этилаётган умумийлик ва ўзаро боғлиқлик бор», — деган губернатор журналистларга чиқишида.
Гевин Нюсомнинг айтишича, фармойиш бугун тундаёқ кучга киради. У фуқаролар онгли равишда таклиф қилинган чекловларга риоя қилишларига умид билдирган.
Шунга ўхшаш қарор бироз олдинроқ шу штатдаги Лос-Анжелес округи расмийлари томонидан «Уйда хавфсизроқ» номи остида чиқарилган. Бундай чораларга дастлаб Калифорниянинг яна бир йирик шаҳри бўлмиш Сан-Франсиско расмийлари ҳам мурожаат қилган.
«Уйда қолинг» режимида фақат озиқ-овқат, дори-дармон ва биринчи навбатда зарур нарсалар учун ташқарига чиқишга рухсат берилади. Бундан ташқари, фармонда биринчи навбатдаги зарур нарсалар сотилмайдиган барча савдо марказлари ва дўконлар ишини тўхтатиш, шунингдек, болалар майдончаларидан фойдаланишни тақиқлаш ҳам кўзда тутилган.
Шу билан бирга, у супермаркетлар, озиқ-овқат дўконлари ва бозорлар, ёқилғи қуйиш шохобчалари, ижтимоий хизматлар, банклар, оммавий ахборот воситалари ва жамоат транспортларига ишлашга рухсат беради.
Губернаторнинг таъкидлашича. Бундай чоралар коронавирис тарқалиши даражасини камайтиришга ёрдам беради. Агар қатъий чоралар кўрилмаса, кейинги 8 ҳафта давомида штат аҳолисининг 56 фоизи, яъни қарийб 22 миллион киши коронавирусга чалиниши мумкинлигини билдирган.
Эсалтиб ўтамиз, Калифорния АҚШда коронавирус қурбонлари сони бўйича учинчи ўринда турибди. Ушбу штатда 18 та ўлим ҳолати қайд этилган. Умумий ҳисобда қарийб 1000 киши касалланган.
Изоҳ (0)