Саудия Арабистони ҳукумати коронавирус пандемиясининг олдини олиш мақсадида Маккадаги Ал-Ҳаром ва Мадинадаги Набавий Масжидда ибодатларни вақтинча тўхтатишга кўрсатма берди, деб хабар қилади Al-Ekhbariya телеканали.
Ушбу чора 20 мартдан кучга киради ва вазият ўнгланмагунча амал қилади.
17 мартдан подшоҳликда Ал-Ҳаром ва Набавий Масжиддан ташқари барча масжидларда жамоат, жумладан жума намозларига вақтинча тақиқлов киритилганди. Энди бу икки бош масжид ҳам ибодатлар учун ёпилади.
«Макка ва Мадинадаги икки муқаддас масжид, жумладан уларнинг ҳовлиларида жамоат намозларини адо этиш вақтинча тўхтатилади», — дейилган хабарда.
Февраль охирида Саудия Арабистони расмийлари Макка шаҳрида Умра амалини бажариш ва Мадинада Набавий Масжидни зиёрат қилиш учун келадиган фуқароларнинг мамлакатга киришини вақтинча тўхтатиб қўйганди. Маккада коронавирус туфайли зиёратчиларнинг Каъба атрофидаги майдонга ўтиши вақтинча чекланган.
Мавзуга доир: Ўзбекистонда жума намозлари вақтинча ўқилмайди — Усмонхон Алимов мусулмонларга мурожаат қилди
Сўнгги маълумотларга кўра, подшоҳликда коронавирусга чалинганлар сони 19 март куни 36 нафарга кўпайиб, умумий ҳисобда 274 нафарга етган.
Изоҳ (0)