Кенияда браконьерлар иккита камёб оқ жирафани отиб ўлдирди

Кениядаги қўриқхонада браконьерлар иккита камёб жониворлар оқ тусдаги она жирафа ва унинг боласини отиб ўлдиргани аниқланди. Қўриқхона ишчилари жирафаларнинг суякларини топган. Жониворлар тўрт ҳафта олдин отиб ўлдирилган, деб ёзмоқда CNN.

Ушбу воқеадан кейин бутун дунёда камёб оқ рангли жирафаларнинг ягона вакили қолди, ушбу ҳайвон Кениянинг Ишакбини Хирола қўриқхонаси ҳудудида яшайди.

Илк бора оқ рангдаги урғочи жирафа ҳақида 2017 йилда маълумотлар пайдо бўлган ва унинг Кения ҳудудида юргани акс этган фотосуратлар дунё ОАВда кенг ёритилганди.

Олимларнинг фикрича, жирафа албинос ҳисобланмайди. Унинг ўзига хос мутацияси лейкизми мавжуд ва ушбу жараён оқибатида ҳайвон организмида пигментация йўқолиб оқ доғлар пайдо бўлади. Лейкизм жирафа боласи ҳомила сифатида ривожланаётган даврда ҳам бошланиши мумкин.

Икки йил аввал урғочи жирафа иккита бола туғган ва уларнинг ранги ҳам оппоқ эди. Олимлар жирафаларнинг янги тури пайдо бўлиши мумкинлигини таъкидлаган. Аммо, браконьерлар урғочи жирафа ва унинг болаларидан бирини отиб ўлдириши режаларни барбод қилди. Мамлакат ҳукумати содир бўлган жиноят юзасидан суриштирув ишларини бошлаган.