Ўзбекистонда коронавирус инфекцияси аниқланган беморлар сони 18 нафарга етди. Бу ҳақда Соғлиқни сақлаш вазирлиги матбуот хизмати хабар бермоқда.
Маълум бўлишича, 11 март куни Франциядан қайтган, Ўзбекистондаги расман биринчи коронавирус ташувчисига айланган олий тоифали шифокор аёлнинг онаси, келини ва бирга ишлайдиган ҳамкасбида ҳам коронавирус аниқланган.
Вазирликдан маълум қилишларича, ҳар уч фуқаро ҳам шу вақтгача тиббий назоратда бўлган. Аввалроқ биринчи бемор аёлнинг ўғли, қизи, турмуш ўртоғи, невараси, шунингдек, бир қариндошида ҳам коронавирус аниқланган эди.
«Инфекция тарқалиб кетишининг олдини олиш мақсадида олиб борилаётган эпидемиологик суриштирув ишлари давом эттирилмоқда», — дейилади Соғлиқни сақлаш вазирлиги ахборотида.
Бир кунда еттита янги касалланиш ҳолати
Ўзбекистонда коронавирусга чалиниш билан дастлабки ҳолат 15 март куни соат 6:00 да қайд этилган эди. Вирус 11 март куни тонгда Франциядан қайтган олий тоифали шифокор аёлда аниқланган. Кейинчалик унинг ўғли, қизи, турмуш ўртоғи, невараси, онаси, келини, яна бир қариндоши ва бир ҳамкасбида ҳам вирус аниқланди.15 март оқшомида Ўзбекистонда коронавируснинг янги ташувчиси қайд этилди — 15 март куни тонгда Истанбул—Тошкент рейсида қайтган эркакда касаллик аниқланди. Кейинчалик унинг рафиқаси, шу рейсда бўлган яна бир фуқаро ҳамда бошқа бир эр-хотин ҳам касаллангани маълум бўлди.
14 март куни амалга оширилган Лондон—Тошкент рейсида келган Ўзбекистон фуқаросида 16 март куни коронавирус аниқлангани маълум қилинди. Кейинчалик унинг ҳам рафиқасидан, шунингдек, шу рейсда бўлган яна бир йўловчида ҳам коронавирус аниқланди. 17 март куни расмийлар Дубайдан келган яна бир фуқарода инфекция аниқлади.
Шундай қилиб, Ўзбекистонда 15 март куни тўрт кишида, 16 март куни тўрт кишида, 17 март куни уч кишида, 18 март куни эса етти кишида коронавирус аниқланди.
Изоҳ (0)