Мактабгача таълим вазирлигига «Болажон» ва яна 3 та телеканал видео-машғулотлар учун берилиши мумкин

Мактабгача таълим вазирлигига «Болажон» ва яна 3 та телеканал видео-машғулотлар учун берилиши мумкин. Бу ҳақда Агриппина Шин коронавирус инфекцияси туфайли карантин даврида мактабгача талим тизимида кўрилаётган чоралар хусусидаги давра суҳбатида маълум қилди.

«Биз бу борада ‘Ўзбекистон’ миллий телерадиокомпанияси билан ишларни бошладик. Биринчи галда — бу ‘Болажон’ канали. Аммо раҳбарият билан бизга яна 3 та канални видео-машғулотларни узатиш учун тақдим этилишини муҳокама қилдик».

Шунингдек, методистлар, етакчи мутахассислар томонидан ота-оналарга уйда болалари билан машғулотлар олиб бориш, қўл меҳнатига асосланган буюмлар ясаш борасида кўмак берилади. Мактабгача таълим муассасасида карантин даврида ишлайдиган методистларнинг асосий вазифаси ота-оналар билан тушунтириш ишларини олиб бориш, болалар билан бўш вақтларини ташкил этиш борасида тавсиялар беришдан иборат бўлади.Бундан ташқари, улар амалдаги масалалар, иш жараёнида тўпланиб қолинган муаммолар билан шуғулланиш, қоғозлар билан ишлаш, янги режалар тузиш, иш услубида ўзгаришлар қилиш билан машғул бўлишлари мумкинлиги таъкидланди.

Эслатиб ўтамиз, мактабгача таълим тарбияланувчилари учун 16 март кунидан таътил эълон қилинган. Карантин шартли равишда 31 мартгача давом этиши белгиланган. Аммо мазкур муддат Республика махсус комиссияси томонидан бериладиган буйруқ билан ўзгариши мумкин.