Видео: Қозоғистоннинг Олмаота шаҳрига карантин туфайли ҳарбий техникалар олиб келинди

Қозоғистоннинг Олмаота шаҳрига ҳарбий техника киритилмоқда, деб хабар берди Tengrinews.

Ижтимоий тармоқларга фойдаланувчилар шаҳар бўйлаб юрган ўнлаб ҳарбий техника видеосини жойлаштирган.

Шаҳар ҳокимияти ҳарбий техника киритилиши карантин билан боғлиқ эканлигини тасдиқлаган.

Шунингдек, шаҳарга кириш жойларида 27 та блокпост ўрнатилади. Блокпостларда патрул полицияси, СОБР, «Гранит» полки, мудофаа вазирлиги ва миллий гвардия кучлари хизмат олиб боради. Шу билан бирга шаҳарга биринчи эҳтиёж буюмлари, озиқ-овқат маҳсулотлари, дори-дармон ва тиббий маҳсулотлар, шахсий ҳимоя ва гигиена воситалари олиб кириш учун «яшил йўлак» ўрнатилади.

«Барчамиз учун муҳим дақиқалар келди. Карантин режими мегаполиснинг бутун ҳаёти янги қоидаларга кўра, қайта ташкиллаштирилишини англатади. Карантин ноқулайликлар, одатдаги турмуш тарзининг бузилиши билан кечади. Буни тўғри тушунишни илтимос қиламан», — деган Олмаота ҳокими Бакитжан Сағинтаев.

У шаҳардаги муассасаларни карантинга киритилиши сабаб масофадан ишлашга чақирган. Шаҳарда карантин 19 мартдан амал қила бошлайди.

Эслатиб ўтамиз, Қозоғистонда коронавирус тарқалиши муносабати билан 16 мартдан 15 апрелга қадар фавқулодда ҳолат режими жорий қилинди. Бу даврда қозоғистонликлар мамлакатни тарк эта олмайди (хорижга даволаниш учун кетаётганлардан ташқари).

Ҳозирда Қозоғистонда коронавирусни юқтириб олганлар сони 33 нафарга етган. Жумладан 15 та ҳолат Олмаотада қайд этилган.

Мамлакатда оммавий тадбирлар бекор қилинди, мактаб ўқувчилари таътилга эртароқ чиқди, давлат органларига хорижга хизмат сафарига чиқиш тақиқланди. Фуқароларга қўл бериб кўришмаслик тавсия қилинди.

Чимкентликлар ҳалокатли коронавируснинг олдини олиш учун халқ табобати усулларига мурожаат қилиб, исириқ сотиб олишни бошлади. Айрим бозорларда исириқнинг ҳаммаси сотилиб кетган.