Туркияда коронавирусдан биринчи ўлим ҳолати қайд этилди. «РБК»нинг Anadolu’га таяниб хабар беришича, бу ҳақда соғлиқни сақлаш вазири Фаҳриддин Хўжа маълум қилди.
Унинг айтишича, касалликдан 89 ёшли бемор вафот этган. «У вирусни Хитой сафаридан қайтган ходимидан юқтирганди», — дея аниқлик киритган Фаҳриддин Хўжа.
Вазирнинг таъкидлашича, мамлакатда умумий ҳисобда 98 киши коронавирус билан касаллангани тасдиқланган.
Эслатиб ўтамиз, 11 март куни Туркияда коронавирус билан касалланиш бўйича дастлабки ҳолат қайд этилганди. Мамлакат фуқароси Европага борганида коронавирусни юқтириб олган. У билан алоқада бўлганларнинг барчаси шифокорлар назоратига олинган.
Ҳукумат туроператорларга коронавирус тарқалиши муносабати билан сайёҳлик мавсумини бошлашга шошилмасликни тавсия қилган. Шунингдек, коронавирус пандемияси сабабли барча мактаблар 16 мартдан бошлаб 1 ҳафтага ёпилган.
Аввалроқ коронавирус АҚШнинг барча штатларида аниқлангани, Қирғизистонда ҳам илк бор коронавирусга чалинишнинг 3 та ҳолати қайд этилгани хабар берилганди. Хитойда эса ўтган сутка ичида коронавирус инфекциясини юқтириш билан боғлиқ 13 та янги ҳолат қайд этилди.
Мавзуга доир:
Изоҳ (0)