Ўзбекистон Давлат солиқ қўмитаси ҳузурида Фискал институт ташкил қилиниши режалаштирилмоқда. Мазкур таълим муассасининг ташкил қилиниши «Илм, маърифат ва рақамли иқтисодиётни ривожлантириш йили» давлат дастури доирасида амалга оширилмоқда. Институтнинг ташкил этилишини кўзда тутувчи Президент қарорининг лойиҳаси жамоатчилик муҳокамаси учун эълон қилинди.
Қарор лойиҳасига кўра, ташкил этилиши кутилаётган Фискал институтга 2020/2021-ўқув йилида 420 нафар бакалавриат талабаси қабул қилинади. Улардан 130 нафарини давлат гранти, 290 нафарини эса тўлов-шартнома асосида ўқишга қабул қилиш кутилмоқда. Магистратура йўналишига эса 5 та давлат гранти ажратилади ва 21 киши тўлов-шартнома асосида ўқиш имкониятга эга бўлади.
Ҳужжат лойиҳасида қайд этилишича, институт «Солиқлар ва солиққа тортиш», «Молиявий назорат ва аудит», «Солиқ, молия ва тижорат ҳуқуқи», «Иқтисодиётда ахборот технологиялари» таълим йўналишлари ва мутахассисликлар бўйича кадрлар тайёрлайди. Шунингдек, институтда Россия ҳукумати ҳузуридаги Молия университети факультети ташкил этилиши режалаштирилмоқда.
Фискал институтни ташкил этиш мақсадида Жаҳон банки томонидан 10 миллион доллар миқдорида кредит ажратилади. Институт бошқаруви Давлат солиқ қўмитаси раиси томонидан амалга оширилади.
Эслатиб ўтамиз, Ўзбекистон Президентининг «Давлат солиқ хизмати органлари фаолиятини тубдан такомиллаштириш чора-тадбирлари тўғрисида»ги қарорига биноан 2018 йилда Солиқ академияси тугатилган эди.
Изоҳ (0)