Ўзбекистон Бош прокуратураси томонидан маълум қилинишича, Facebook ижтимоий тармоғида 2020 йилнинг 14 февраль куни Тошкент шаҳар Яккасарой тумани Шаршара кўчасида Миллий гвардия ходимлари бир нафар ҳуқуқни муҳофаза қилувчи идора ходими деб тахмин қилинаётган шахснинг ортидан қувганлиги ҳақида хабар тарқалган.
Ижтимоий тармоқда тарқалган хабарга кўра, Миллий гвардия ходимлари таъқибидан қочган мазкур шахс ўзини Бўрижар каналига ташлаган ва орадан икки ҳафта ўтгач, ушбу каналдан унинг мурдаси топилган. Қайд этилишича, мазкур шахснинг Миллий гвардия ходимларидан қочишига унинг мазкур туманда яшовчи бир аёл билан жанжаллашгани сабаб бўлган.
Facebook’да берилган хабарда таъкидланишича, аёл ва йигит ўртасида жанжал юз берган жойга Миллий гвардия ходимлари етиб келган. Йигит улардан қочган ва таъқибдан қутулиш учун Бўрижар каналига сакраган.
Орадан икки ҳафта ўтгач, йигитнинг жасади ҳуқуқни муҳофаза қилувчи идоралар томонидан канал тубидан топилган.
Бош прокуратура томонидан қайд этилишича, айни пайтда мазкур ҳолат бўйича дастлабки суриштирув ишлари олиб борилмоқда.
Аввалроқ мазкур каналдан 1954 йилда туғилган аёлнинг жасади топилган ва Бош прокуратура мазкур ҳолат бўйича муносабат билдирган эди. Шунингдек, Чилонзордаги каналдан белига тош боғлаб ташлаб кетилган чақалоқ, Самарқандда Сиёб каналига тушиб кетган 3 ёшли боланинг жасади топилган эди.
Изоҳ (0)