Айни пайтда Ўзбекистонда бўлиб турган ҳамда барча авиа ва автомобиль қатновларининг тўхтатилиши сабабли мамлакатдан чиқиб кета олмаган чет эл фуқароларининг визалари муддати автоматик тарзда 2020 йилнинг 10 апрелигача узайтирилди. Бу ҳақда Ўзбекистон Ташқи ишлар вазирлиги хабар берди.
Маълум қилинишича, Ўзбекистонда COVID-19 коронавирусининг тарқалишига қарши курашиш бўйича чеклов чоралари муносабати билан Республика махсус комиссияси Ўзбекистонда бўлган ва кетишга улгурмаган хорижий фуқароларга илгари берилган визаларининг амал қилиш муддатини автоматик тарзда 2020 йил 10 апрелгача узайтириш ҳақида қарор қабул қилди.
Шунингдек, Ўзбекистонга визасиз кириш ҳуқуқига эга бўлган хорижий фуқароларга мамлакатда 2020 йил 10 апрелгача қолишга рухсат берилади. Ушбу тоифадаги чет эл фуқароларига нисбатан маъмурий чоралар кўрилмайди.
Эслатиб ўтамиз, Ўзбекистонда 15 март куни коронавирус юқтириш билан боғлиқ биринчи ҳолат қайд этилгани сабабли хорижий мамлакатлар билан барча авиа ва автоқатновлар тўхтатилди. Чет элда қолган ватандошлар чартер рейсларида қайтарилиши маълум қилинди.
Аввалроқ Ташқи ишлар вазирлиги Ўзбекистон фуқароларига ватанга қайтиш учун давлат чегарасидан ўтиш тақиқланмаганини маълум қилган эди.
Ҳозирча Ўзбекистонда коронавирус юқтириб олганлар сони 11 кишига етди.
Изоҳ (0)